VOV4.Bahnar - Pơ gê ‘năr 6/5, tơ̆ apŭng Củ Chi, Kơ dră teh đak Nguyễn Xuân Phúc kŭm hăm dôm bơ ngai lĕch pơ jei pơm bơ ngai tang măt Kuôk hô̆i jăl 15, anih jang pôk rơ̆ih kơ sô̆ 10 (apŭng Củ Chi, Hóc Môn) hlôi vang hop akŏm tơ roi tơ drong mŭk drăm – joh ayŏ tơ pôl – vei lăng sơ đơ̆ng teh đak truh hăm bơ ngai lĕch pơ jei pơm bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei pơ lei tơm Hồ Chí Minh jăl jang 2021-2026. Hop akŏm pơ gơ̆r hơ drol 3 năr hơ drol kơ hop akŏm tơ ƀơ̆p pơ ma dơ nuh đơ̆ng bơ ngai lĕch pơ jei pơm bơ ngai tang măt Kuôk hô̆i jăl 15, anih jang pôk rơ̆ih kơ sô̆ 10 hăm bơ ngai tăh hla. Hop akŏm vă tơ roi truh hăm rim bơ ngai lĕch pơ jei găh tơ drong mŭk drăm tơ pôl, vei sơ đơ̆ng teh đak đơ̆ng apŭng Củ Chi, Hóc Môn jăl jang âu ki, trong vă jang hơ tŏk tơ iung tơ̆ hơ năp kơnh. Hơ dai hăm ‘noh, tơ̆ hop akŏm kŭm gô pơ ma dơ nuh păng tơ roi dơ̆ng rim tơ drong tơm păng rim bơ ngai lĕch pơ jei bơ ngơ̆t truh vă tơ mơ̆t lơ̆m tơ drong bơ̆ jang mă hơ dăh. Lơ̆m tơ drong bơ̆ jang, Kơ dră teh đak Nguyễn Xuân Phúc tơ băt tôch kơ hơ iă đei Jơ nŭm vei lăng pôk rơ̆ih teh đak rơ̆ih pơm bơ ngai tang măt Kuôk hô̆i jăl 15 tơ̆ pơ lei tơm Hồ Chí Minh. Tơ dăh đei pôk hơ tŏk, ƀok gô hơ drin đĭ jơ hngơ̆m bơ̆ jang ăn teh đak, pơ vih pơ văn ăn kon pơ lei.

Thuem: Tơ blơ̆