VOV4.Bahnar - Ƀlep ƀât Việt Nam jang đang ‘lơ̆ng jăl jang đơ̆ng Tĕh đak jang pơ lơ̆h lơ̆m Jơ nŭm vei lăng sơ đơ̆ng LHQ jăl jang 2020 – 2021, Kơ dră tĕh đak Nguyễn Xuân Phúc ‘nao đei nơ̆r pơma tơ băt gĭt kăl, lơ̆m nŏh pơ ma hơ dăh Việt Nam ‘nao sơ đơ̆ng jơ hngâm, iŏk jang lơ hơ năp jang gĭt kăl lơ̆m apŭng plenh tĕh yoa tơ drong rơ ngei păng jang tŏk pran kơ jăp.

Iŏk yoa jơ hngâm pran ‘nao kơ tĕh đak, hăm đon adrin tôch ai, Việt Nam vang bơ̆ jang tôch kơ chăng, ‘lơ̆ng, tơ lĕch lơ tơ drong pơ chĕh, tơ gop đei yoa ăn tơ drong jang đơ̆ng Jơ nŭm vei lăng sơ đơ̆ng, hăm nơ̆r tơ băt tôch rơ đăh ‘nŏh “Tĕh đak jang hơ doi yoa tơ drong rơ ngei kơ jăp ‘lơ̆ng” vang chă trong tang găn, sek tơ lang ‘lơ̆ng tơ drong tơ blăh, tơ guăt trong jang hơ doi đơ̆ng Jơ nŭm vei lăng sơ đơ̆ng hăm ASEAN, tơ jră hăm dôm tơ drong nol hăm tơ drong rơ ngei păng sơ đơ̆ng kơ apŭng plenh tĕh, kiơ̆ trong jang kiơ̆ Khôi luơ̆t tơm Liên hợp quốc păng Luơ̆t apŭng plenh tĕh.

Tơ drong ‘nŏh, kŭm tơ ƀôh hơ dăh um rup đơ̆ng 1 Việt Nam hơ bĕch hơ bal, tơ plih ‘nao, hăm nơ̆r tơ băt pran kơ jăp găh trong jang, đon hơ pơi ‘mĕh jang tŏk đơ̆ng tĕh đak truh sơ năm 2045 hlôi đei tơ lĕch lơ̆m Hop akŏm Đảng mă XIII. Vang bơ̆ jang hăm tơ pôl apŭng plenh tĕh hrei ‘nâu, ‘nŏh jĭ 1 tĕh đak Việt Nam ‘nao, sơ đơ̆ng ‘lơ̆ng, kơ chăng iŏk jang lơ hơ năp jang gĭt kăl lơ̆m apŭng plenh tĕh yoa tơ drong rơ ngei păng jang tŏk pran kơ jăp.

Dơ̆ng: Tơ blơ̆