VOV4.Bahnar - Sơng iŏk nơ̆r krao hơ vơn đơ̆ng Đại tướng Phan Văn Giang, Kơ dră tơm vei lăng khul linh tĕh đak bơ̆n, Khul tang măt ăn khul linh tĕh đak Anh păng Bắc Ai-len yoa ƀok Robert Ben Lobban Wallace, Kơ dră tơm vei lăng khul linh chĕp kơ̆l năm hơ pong tơ̆ Việt Nam đơ̆ng ‘năr 21 - 23/7/2021. 

Lêh sơng Kơ dră tơm vei lăng khul linh tĕh đak Anh păng Bắc Ireland Robert Ben Lobban Wallace

Pơ gê 22/7, tơ̆ Anih jang kơ Anih tơm vei lăng khul linh tĕh đak, Đại tướng Phan Văn Giang, Kơ dră jang lơ̆m Anih tơm Chinh trĭ, Phó Bí thư Quân ủy Trung ương, Kơ dră tơm vei lăng khul linh tĕh đak pơ gơ̆r pơm lêh sơng păng pơ ma đam hăm ƀok Robert Ben Lobban Wallace kŭm hăm dôm bơ ngai lơ̆m khul.

Lơ̆m jơ pơ ma đam, Kơ dră tơm vei lăng khul linh tĕh đak Anh păng Bắc Ai-len mơ̆ng nơ̆r tơ roi găh trong jang đơ̆ng Việt Nam mưh vă sek tơ lang tơ drong tơ̆ đak dơ sĭ biển Đông, pơ ma hơ dăh tơ drong gĭt kăl đơ̆ng yak vih vât hiôk hian tơ̆ trong đak dơ sĭ, trong gre păr, tơ gŭm ăn tơ drong jang kiơ̆ luơ̆t, akhan dôm tơ drong ưh kơ lăp băl kăl đei sek tơ lang kiơ̆ trong rơ ngei, ‘moi kiơ̆ luơ̆t apŭng plenh tĕh. Drơ̆ng nơ̆r akhan, khei ‘năr âu ki, tơ drong pơ vei jang hơ doi đơ̆ng 2 tĕh đak đei tŏk ‘lơ̆ng, hăm lơ tơ drong jơ nei găh chinh trĭ, mŭk drăm, tĕch mơ dro, jŏh ayŏ kơ dŏ xoang, pơ tho pơ hrăm.

Dơ̆ng: Tơ blơ̆