VOV4.Bahnar - Drơ̆ng nơ̆r krao hơ vơn đơ̆ng Kơ dră tơm vei lăng khŭl linh Việt Nam, khŭl tang măt khŭl linh gĭt kăl teh đak Cộng hòa Nhân dân Trung Hoa yua đơ̆ng thượng tướng Ngụy Phượng Hòa, Bơ ngai jang lơ̆m Quốc vụ, Kơ dră tơm vei lăng khŭl linh, pơm kơ dră khŭl năm tơ mang tơ̆ Việt Nam đơ̆ng ‘năr 24 truh ‘năr 27/4. Lêh sơng đei pơ gơ̆r kơ sơ̆ ‘năr 25/4, tơ̆ Hà Nội, yua đơ̆ng thượng tướng Phan Văn Giang, Bơ ngai jang lơ̆m Anih tơm Chĭnh trĭ, Phŏ bí thư Quân ủy Trung ương, Kơ dră tơm vei lăng khŭl linh Việt Nam pơ gơ̆r. Đơ̆ng rŏng lêh sơng, khŭl tang măt khŭl linh gĭt kăl 2 teh đak pơ gơ̆r pơ ma đam.

Lêh sơng Kơ dră tơm vei lăng khŭl linh teh đak Trung Quốc

Thượng tướng Phan Văn Giang pơ ma hơ dăh Đảng, teh đak, khŭl kơ dră teh đak păng khŭl linh kon pơ lei Việt Nam ling lang lăng kăl tơ drong hơ met ming tơ drong jang tơ bôl joăt joe păng pơ trŭt tơ drong pơ vei jang hơ dai tôm tơ drong hăm Trung Quốc. Thượng tướng Ngụy Phượng Hòa pơ ma hơ dăh, tơ drong pơ vei jang hơ dai khŭl linh đơ̆ng Trung Quốc păng Việt Nam jĭ 1 lơ̆m dôm tơ drong jang gĭt kăl, tơ gop hơ tŏk ‘lơ̆ng tơ drong pơ vei jang tơ bôl, jang hơ dai đơ̆ng 2 Đảng, teh đak, yua kơ tơ drong đei yua đơ̆ng kon pơ lei 2 teh đak, yua kơ tơ drong rơ ngei, sơ đơ̆ng, jang hơ dai, hơ tŏk tơ iung tơ̆ rim teh đak kŭm nhen kơ lơ̆m tơ ring păng apŭng plĕnh teh.

Thuem: Tơ blơ̆