VOV4.Bahnar - Pơgê năr 27/12, Dơnŏ anĭh tơm vei lăng trong gre nơnăm jang hơdoi hăm Dơnŏ anĭh vei lăng kon pơlei dêh char Lai Châu pơgơ̆r pơm lêh iung jang Tơdrong vă jang tơgoăt trong nơnăm rim dêh char groi kông găh Tu.

Kơ iĕng Thủ tướng Phạm Bình Minh kơtĭt jơ tơlĕch iung jang

Tơdrong vă jang hăm kon jên tơmơ̆t jang hlŏh 5.300 ti hlak jên, tơgŭm pơm trong jăl yak đơ̆ng tơring kơdrơ̆m rim dêh char Lai Châu, Lào Cai, Yên Bái păng rim tơring anai đei ƀơm trŭh brŏk vĭh tơ̆ Hơnih tơm Hà Nội. Iung pơma tơ̆ jơ pơm lêh, Kơ iĕng Thủ tướng Phạm Bình Minh sơkơ̆t hơdăh, hơnăp jang kơ tơdrong vă jang lơ̆m hơmet pơ ‘lơ̆ng trong nơnăm, pơtrŭt kơtang atŏk tơ iung mŭk drăm - tơpôl ăn rim dêh char đei tơdrong vă jang păng pơ đĭ lơm tơring Tây Bắc. Vă tơdrong vă jang au đei iung jang ming man ƀlep khei ‘năr pơkă, Kơ iĕng Thủ tướng Tĕh đak athei bơngai chĕp kơ̆l Dơnŏ anĭh tơm vei lăng Trong gre nơnăm, Khul kơdră chĕp pơgơ̆r tơdrong vă jang 2 kăl chĕp pơgơ̆r kơ jăp, vei lăng kơ jăp tơdrong ming man kơ jăp ‘lơ̆ng, kon jên tơmơ̆t jang lơ̆m prăt khei ‘năr ming man, sơđơ̆ng ƀlep hăm khôi luơ̆t.

Tơblơ̆ nơ̆r: Amazưt