VOV4.Bahnar - Kơsơ̆ năr 12/11, Khŭl bơ̆ jang kơ Dơnŏ anĭh tơm vei lăng jang pơgang kơ yuơ Kơ iĕng Kơdră chĕp pơgơ̆r Nguyễn Trường Sơn bơ̆jang hăm Dơnŏ anĭh chĕp pơgơ̆r tang găn jĭ Covid-19 dêh char Dak Lăk găh bơ̆ jang iŏk đak mŭh, khăm hơlen, ming hơmet jĭ ăn bơngai jĭ. Đơ̆ng năr 27/4 trŭh dang ei Dak lăk đei 5.872 ‘nu bơngai jĭ Covid-19. Lơ̆m 14 năr tơjê̆ au, Dak Lăk đei  2.074 ‘nu bơngai jĭ Covid-19. Lơ̆m au đei 1.429 ‘nu bơngai jĭ đei ƀô̆h lơ̆m kon pơlei, tơmơ̆t vă jê̆ 69% măt bơngai jĭ đei ƀô̆h.

Kơ iĕng Kơdră chĕp pơgơ̆r Dơnŏ anĭh tơm vei lăng jang pơgang Nguyễn Trường Sơn iung pơma tơ̆ jơ bơ̆ jang

Hăm bơ̆ jang pơjing păng khăm hơlen ming hơmet: dêh char hlôi pơjing 6 hơnĭh ming hơmet bơngai jĭ Covid-19 hăm đei 3.222 tŏ giơng bơngai jĭ tep. Tơ̆ hơnăp tơdrong jĭ roi kơtang, dêh char gô atŏk lơ dơ̆ng giơng tep ăn bơngai jĭ Covid-19 trŭh 5.580 tŏ giơng. Vă tơpŭh kĕ jĭ Covid-19, tơ̆ jơ bơ jang, dêh char Dak Lăk apĭnh rim hơnĭh tơm, hơnĭh bơ̆ jang, mă kăl Dơnŏ anĭh tơm vei lăng jang pơgang tơgŭm ăn dêh char kmăi kmŏk păng ăn khŭl jang đơ̆ng rim dêh char vă tơgŭm Dak Lăk ming hơmet jĭ ăn bơngai jĭ Covid-19; Tơgŭm dơ̆ng vaccine ăn dêh char vă pơgơ̆r ƀet bơ̆ng ăn đĭ đăng bơngai đơ̆ng 18 sơnăm năm tơ̆ ‘lŏ kră, kon pơlei brŏk vĭh đơ̆ng tơring jĭ hơbŭh păng đe hơ iŏh đơ̆ng 12-17 sơnăm; tơgŭm tơ iung pơjing, bơ̆ jang kơ 1 Hnam pơgang pơgia tơ̆ tơ̆ng 3 vă ming hơmet ăn bơngai jĭ ăl, ming hơmet jĭ Covid-9 kơ dêh char.

Tơblơ̆ nơ̆r: Amazưt