VOV4.Bahnar - Năr 9/6, ƀok Phạm S - Kơ iĕng Kơdră chĕp pơgơ̆r Dơnŏ anĭh vei lăng kon pơlei dêh char Lâm Đồng hlôi năm bơ̆ jang dăr lăng tơdrong jang tang găn jĭ Covid-19 tơ̆ lơ̆m rim apŭng Đức Trọng, Lâm Hà. Tơ̆ apŭng Đức Trọng, khŭl hlôi năm ngôi, dăr lăng hơnĭh gak tang găn jĭ Covid-19 pơjing tơ̆ Hơnĭh cham gre păr Liên Khương (thĭ trân Liên Nghĩa) păng tơ̆ Trong Glung 28B, găh lơ̆m tơring Ninh Loan tơtil hăm dêh char Bình Thuận. Hlŏh đơ̆ng dăr lăng, ƀok lŏhPhạm S hlôi ƀô̆h hơdăh tơdrong gak vei lăng đơ̆ng rim khŭl tơ̆ hơnĭh gak bơ̆ jang tôch kơ ‘lơ̆ng, tơnăp păng pơjing rơvơn pơtho tơbăt ăn kon pơlei tơroi tơbăt jơhngơ̆m jăn tang găn jĭ Covid-19 mư̆h yak hlŏh hơnĭh au. Tơ̆ apŭng Lâm Hà, kiơ̆ đơ̆ng kơdră chĕp pơgơ̆r apŭng tơbăt, bơ̆ jang tang găn jĭ Covid-19 lơ̆m apŭng hlôi bơ̆ jang ‘lơ̆ng păng kơtang kiơ̆ rim hla bơar pơrô̆ jang đơ̆ng Trung ương, dêh char. Ƀok Phạm S athei apŭng Lâm Hà hơnơ̆ng jang kiơ̆ hla bơar pơrô̆ jang ‘nao hlŏh đơ̆ng Trung ương, dêh char; lơ̆m au, đei trong ‘nao găh tơring ăn oei hơtăih dĭh băl kiơ̆ nơ̆r athei jang kiơ̆ 15 păng tơring ăn oei hơdrô̆ kiơ̆ Nơ̆r athei jang kiơ̆ 16 kơna apŭng, tơring kăl lăng kơ jăp.

Tơblơ̆ nơ̆r: Amazưt