VOV4.VBahnar - Kơsơ̆ năr 16/4, ƀok Nguyễn Khắc Định, Kơ iĕng Kơdră chĕp pơgơ̆r Kuô̆k hô̆i, Ƀĭ thư Đảng dêh char, Kơdră chĕp pơgơ̆r Khŭl kơdră tang măt Kuô̆k hô̆i dêh char Khánh Hòa pơm tơm Hop akŏm Khŭl kơdră chĕp pơgơ̆r Đảng dêh char Khánh Hòa mơ̆ng tơroi tơbăt bơ̆ jang hơmet ming Trong pơ prŏ atŭm Tơring jang Mŭk drăm Vân Phong păng Tơdrong vă jang trong bơ̆ jang atŏk tơ iung Tơring jang Mŭk drăm au. Kiơ̆ nơ̆r athei đơ̆ng rim hơnĭh jang tơgŭm tơbăt, Tơring jang Mŭk drăm Vân Phong đei hơgăt tĕh să hlŏh 150.000 ha, lơ̆m au groi tĕh păng achon đak dơsĭ ‘nŏh tơmơ̆t mĭnh poăt. Hơnĭh jang tơgŭm tơbăt athei iŏk dơ̆ng hơgăt tĕh găh tơring Xuân Sơn, apŭng Vạn Ninh dang 3.500 ha păng bơbĭt iŏk đak dơsĭ dang 1.500 ha. Ƀok Nguyễn Khắc Định, Kơ iĕng Kơdră chĕp pơgơ̆r Kuô̆k hô̆i, Ƀĭ thư Đảng dêh char Khánh Hòa athei, rim hơnĭh bơ̆ jang kơ dêh char Khánh Hòa hrôih pơjing khŭl bơ̆ jang iung jang hơdoi hăm Khŭl kơdră chĕp pơgơ̆r Tơring jang Mŭk drăm Vân Phong, tơmơ̆t hloi trong pơ prŏ Tơring jang Mŭk drăm Vân Phong lơ̆m trong pơ prŏ vă jang atŭm kơ dêh char Khánh Hòa.

Tơblơ̆ nơ̆r: Amazưt