VOV4.Bahnar - Ƀlep lơ̆m tơdrong pơgơ̆r “ Rang hơdăh tơdrong hơdrin Việt” sơnăm 2021, pơgê năr 13/12, Kơ iĕng Kơdră chĕp pơgơ̆r Kuô̆k hô̆i Nguyễn Khắc Định hlôi đei jơ tơ ƀơ̆p muh măt 20 ‘nu bơngai gơ̆h hơgei, lơ̆m kơsô̆ 50 ‘nu hơdrŭh tơdăm jo jăn gơ̆h hơgei găh 34 dêh char, pơlei tơm vang năm ‘măng pơgơ̆r au. Tơdrong pơgơ̆r “Rang hơdăh Tơdrong hơdrin Việt” sơnăm 2021 vă lang să tơdrong ‘lơ̆ng hơ iă lơ̆m erĭh sa, tơdrong hơdrin lơ̆m tơpôl. 50 ‘nu hơdrŭh tơdăm jo jăn gơ̆h hơgei đei lơ bơngai gơ̆h hơgei hlŏh lơ̆m tơdrong jŏh ayŏ kơdŏ soang, đă ƀŏng lŏng tơplŏng kơdau păng pơtrŭh jơhngơ̆m đon hưch hanh ăn hơdrŭh tơdăm đe hơ iŏh; ư̆h khan hơdrin vang jang lơ̆m tơdrong jang pơjing tơdrong jang, pơjing tơdrong jang iok đei jơnei, mă lei oei tơgŭm ăn rim bôl boăl jo jăn pơjing tơdrong jang, hơdrin vang jang tơgum djru tơpôl ‘nŏh dôm bơngai ‘lơ̆ng lơ̆m tơpôl, mă kăl vang jang lơ̆m pơrô̆ pơrôp, tơgum djru tang găn jĭ Covid-19 au ki. Kơ iĕng Kơdră chĕp pơgơ̆r Kuô̆k hô̆i Nguyễn Khắc Định tơbăt, gô atŭm hăm rim hơnĭh bơ̆ jang kơ Kuô̆k hô̆i hơnơ̆ng pơm pơkeh păng pơgơ̆r jang kiơ̆ jơnei rim trong jang tơgŭm djru đei ƀơm trŭh hăm bơngai jo jăn.

Tơblơ̆ nơ̆r: Amazưt