VOV4. Bahnar - Kơsơ̆ năr 27/12 tơ̆ Hnam Kuô̆k hô̆i, Kơdră jang lơ̆m Dơnŏ anĭh tơm Chĭnh trĭ, Kơ iĕng Kơdră chĕp pơgơ̆r Kuô̆k hô̆i Trần Thanh Mẫn tơƀơ̆p mŭh măt 55 ‘nu bơngai tang măt vang năm Pơm lê̆h Hop akŏm Bơngai jang ‘lơ̆ng “Kơ yuơ bơngai jo jăn đơ̆ng ƀrơ̆m phao pơgang pơm ăn” ‘măng mă 4, jăl jang 2021-2026. Lăp đơ̆ng rŏng mơ̆ng đŏk tơbăt hla bơar bơ̆ jang păng nơ̆r tơgop đơ̆ng rim bơngai tang măt, iung pơma tơ̆ jơ tơƀơ̆p muh măt, Kơ iĕng Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, ‘măng tơblăh vang hăm ƀrơ̆m phao pơgang đơ̆ng Mi pơgơ̆r lơ̆m tơblăh vang tơ̆ Việt Nam hlôi pơm ăn 4 trĭu 800.000 ‘nu bơngai Việt Nam jing dôm bơngai răm đơ̆ng ƀrơ̆m phao pơgang pơm ăn. Tơdrong xek tơlang păng hơmet pơ ‘lơ̆ng tơdrong răm đơ̆ng ƀrơ̆m phao pơgang pơm ăn đơ̆ng rŏng tơblăh vang ‘nŏh mĭnh păh mĭnh tơdrong jang tôch gĭt kăl, mĭnh păh iung jang đunh đai tai sơnăm, tơbăt ăn tơdrong ‘mêm kơ eng kơtang, vă hơlêm ‘mêm kơ eng ăn dôm bơngai vang iung jang lơ̆m tơblăh vang hlôi răm đei ƀơm kơnê̆ đơ̆ng ƀrơ̆m phao pơgang pơm păng rim bơngai jo jăn đơ̆ng ƀrơ̆m phao pơgang Việt Nam. Kơ iĕng Kơdră chĕp pơgơ̆r Kuô̆k hô̆i athei rim Khŭl Đảng, Khŭl kơdră chĕp pơgơ̆r rim tơring păng pơđĭ khŭl jang chĭnh trĭ hơnơ̆ng jang kiơ̆ ‘lơ̆ng rim trong bơ̆jang đơ̆ng Đảng, tĕh đak hăm dôm bơngai jo jăn đơ̆ng ƀrơ̆m phao pơgang pơm ăn; pơjing rơvơn vă Khŭl Bơngai jo jăn đơ̆ng ƀrơ̆m phao pơgang Dioxin pơm ăn rim hơnĭh jang keh đang tơdrong jang mă Đảng, Tĕh đak pơjao lơ̆m chăl hle.

Tơblơ̆ nơ̆r: Amazưt