VOV4.Bahnar - Kơsơ̆ năr 17/11, Kơ iĕng Kơdră chĕp pơgơ̆r Kuô̆k hô̆i Trần Thanh Mẫn atŭm hăm rim kơdră tang măt Kuô̆k hô̆i jăl XV dêh char Hậu Giang hlôi năm tơ ƀơ̆p pơma dơnŭh hăm bơngai tăh hla kơ pơlei tơm Vị Thanh, apŭng Vị Thủy, Châu Thành păng Châu Thành A. 

Tơ̆ jơ tơ ƀơ̆p, bơngai tăh hla pơma tơbăt lăp đon, hôn bơnê kơ ‘Măng hop akŏm mă 2, Kuô̆k hô̆i jăl XV; adoi pơma tơbăt, chă apĭnh athei rim Kơdră tang măt Kuô̆k hô̆i găh lơ tơdrong. Iung pơma tơ̆ jơ tơ ƀơ̆p,Kơ iĕng Kơdră chĕp pơgơ̆r Kuô̆k hô̆i Trần Thanh Mẫn tơgoăt iŏk păng hôn bơnê dôm tơdrong jang jơnei mă dêh char Hậu Giang iok đei lơ̆m khei năr au ki, adoi vang hơlêm dôm tơdrong mơmat tat, hrat hrĭn, tơdrong long đei ƀơm kơnê̆ trŭh tơdrong jang mŭk drăm tơpôl kơ dêh char. Găh mĭnh ƀar nơ̆r chă apĭnh, athei đơ̆ng bơngai tăh hla găh tơdrong jang pơgang, Kơ iĕng kơdră chĕp pơgơ̆r Kuô̆k hô̆i tơroi tơbăt,  Khŭl kơdră Tĕh đak gô pơjing Trong jang gĭt kăl lơ̆m tang găn jĭ hơbŭh Covid-19, chă tơchĕng hơlen, hơnhăk ăn mĭnh ƀar tơmam drăm kmăi kmŏk jang pơgang lơ̆m hơnăm dôm tơmam drăm đei vei lăng kơ jă kơ jăp, pơm sơđơ̆ng kơ jă. Đei trong jang ‘lơ̆ng hơ iă vă roi năr roi đei tơdrong khăm, ming hơmet jĭ jăn ‘lơ̆ng hơ iă lei lăi dĭh băl tơ̆ rim tơring tơrang.

Tơblơ̆ nơ̆r: Amazưt