VOV4.Bahnar - Pơgê năr 14/5, Khŭl bơ̆ jang dăr lăng Jơnŭm vei lăng Pôk rơ̆ih Tĕh đak kơ yuơ Kơdră jang lơ̆m Trung ương Đảng, Kơ iĕng Kơdră chĕp pơgơ̆r Tĕh đak, Kơ iĕng Kơdră chĕp pơgơ̆r Jơnŭm vei lăng Pôk rơ̆ih Tĕh đak Võ Thị Ánh Xuân pơm tơm, hlôi đei jơ năm dăr lăng hơlen bơ̆ jang pôk rơ̆ih tơ̆ dêh char Lâm Đồng.

Kơ iĕng Kơdră chĕp pơgơ̆r Tĕh đak Võ Thị Ánh Xuân dăr lăng bơ̆ jang pôk rơ̆ih tơ̆ Lâm Đồng

Truh dang ei, bơ̆ jang hơmet ăn pôk rơ̆ih tơ̆ dêh char Lâm Đồng đei jang ƀlep trong tơlĕch jang păng khei ‘năr pơkă. Iung pơma tơ̆ jơ bơ̆ jang, Kơ iĕng Kơdră chĕp pơgơ̆r Tĕh đak Võ Thị Ánh Xuân hôn bơnê kơtang bơ̆ jang hơmet ăn pôk rơ̆ih găh rim tơdrong kơ dêh char Lâm Đồng; adoi pơkă, Lâm Đồng hơnơ̆ng atŏk kơtang bơ̆ jang pơrô̆ pơrôp pôk rơ̆ih kơtang hlŏh dơ̆ng, măkăl tơ̆ tơring atăih yăih, tơring kon kông, pơjao rim kơdră jang lơ̆m Dơnŏ anĭh chĕp pơgơ̆r Pôk rơ̆ih bơ̆ jang kơ jăp tơ̆ tơring đơ̆ng năr au vă tơtom hơmet pơ ‘lơ̆ng rim tơdrong tim mă ƀlep tơdăh đei, sơđơ̆ng hơmet ăn tôm rim trong jang ăn năr pôk rơ̆ih đei pơgơ̆r sơđơ̆ng păng ƀlep trong tơlĕch jang.

Tơblơ̆ nơ̆r: Amazưt