VOV4.Bahnar -  Pơgê năr 15/12, tơ̆ hơnĭh bơ̆ jang Khŭl kơdră Tĕh đak, Kơ iĕng Thủ tướng Lê Văn Thành pơm tơm hop akŏm trư̆k tuyên dăr lăng, pơrô̆ pơrôp, hơmet pơ ‘lơ̆ng tơnap tap, tơhlăk tơhlĭn, atŏk kơtang tơlĕch kon jên tơmơ̆t jang tĕh đak sơnăm 2021. Kiơ̆ đơ̆ng Dơnŏ anĭh tơm jang Jên hu tơbăt, hăm 12 hơnĭh tơm, hơnĭh bơ̆ jang Trung ương păng tơring găh dôm hơnih kăl dăr lăng hơlen, jô̆ trŭh năr 30/11/2021 tơlĕch ăn đei vă jê̆ 28.000 ti hlak jên, ‘nao tơlĕch đang lăp 36%. Mĭnh ƀar Hơnĭh tơm, hơnĭh bơ̆ jang Trung ương păng tơring đei tơlĕch kon jên jang tĕh đak to sĕt ‘noh: Dơnŏ anĭh tơm vei lăng Mơdro sa, Dơnŏ anĭh tơm vei lăng jang Tơ iung pơjing ming man, pơlei tơm Hồ Chí Minh... Mă kăl, oei đi mĭnh ƀar Hơnĭh tơm, hơnĭh bơ̆ jang Trung ương păng tơring tim mă klăh asong đĭ trong pơ prŏ vă jang dăh mă kon jên tơmơ̆t jang đei pơjao. Hăm kon jên jang tơring, oei pă 12 tơring tim mă klăh asong pơ đĭ trong pơ prŏ jang đei Thủ tướng Tĕh đak pơjao. Tơ̆ hop akŏm, rim Hơnĭh tơm, hơnĭh bơ̆ jang Trung ương păng tơring, apĭnh athei găh lơ đei ƀơm trŭh trong pơ prŏ jang sơnăm 2021 ‘nŏh apĭnh athei ăn asong pơđunh khei ‘năr jang kiơ̆ trong pơ prŏ jang kon jên tơmơt jang tĕh đak sơnăm 2021 gơ̆h tơlĕch jang lơ̆m sơnăm 2022.

Tơblơ̆ nơ̆r: Amazưt