VOV4.Bahnar - Năr 15/11, Kơ iĕng Thủ tướng Tĕh đak Phạm Bình Minh hlôi năm tơ ƀơ̆p pơma dơnŭh hăm bơngai tăh hla apŭng Long Điền păng apŭng Đất Đỏ dêh char Bà Rịa – Vũng Tàu.  Kơ iĕng Thủ tướng Phạm Bình Minh hlôi tơroi tơbăt ăn bơngai tăh hla găh ‘măng hop akŏm mă 2, Kuô̆k hô̆i jăl 15 hlôi đei jơnei ‘lơ̆ng hơ iă ƀlep hăm trong tơlĕch ăn. Kơ iĕng Thủ tướng jei tơroi tơbăt ăn bơngai tăh hla găh tơdrong tơplĭh hơ iă kơ tơdrong jang mŭk drăm lơ̆m tĕch mơdro tơ̆ tĕh đak đe păng tơmơ̆t jên jang tŏk dơ̆ng. Adoi tơbăt, Khŭl kơdră Tĕh đak tŏk bŏk hơdrin pơtrŭh ăn vaccine tang găn jĭ Covid-19 ăn lơ̆m tĕh đak, hơdrô̆ tơ̆ Bà Rịa - Vũng Tàu đei klăh asong 1 trĭu 800.000 kơliêu. Đơ̆ng rŏng jơ tơ ƀơ̆p, tang măt ăn Khŭl kơdră chĕp pơgơ̆r Tĕh đak, Kơ iĕng Thủ tướng Phạm Bình Minh hlôi apĭnh jet gia, hơlêm păng pôk tơmam drăm ăn 7 ŭnh hnam jang ‘lơ̆ng hơ iă hlŏh lơ̆m vang jang kiơ̆ ‘măng hơvơn, rim tơdrong jang pơting dĭh băl ‘mêm kơ eng Tĕh đak păng tang găn jĭ Covid-19 kơ 2 apŭng Long Điền păng Đất Đỏ. Khŭl jei năm ngôi, tơbăt jơhngơ̆m đon vang ơ̆h sơ ‘ngon păng pôk ăn 25 tơnô̆ tơmam drăm ăn rim ŭnh hnam đei bơngai lôch răm kơ yuơ jĭ hơbŭh Covid-19 pơm ăn.

Tơblơ̆ nơ̆r: Amazưt