VOV4.Bahnar - Dơnŏ anĭh bơ̆ jang ăn Khŭl kơdră Tĕh đak ‘nao chĭh pơtrŭh nơ̆r pơrô̆ jang đơ̆ng Kơ iĕng Thủ tướng Tĕh đak - Kơdră chĕp pơgơ̆r Dơnŏ anih Chĕp pơgơ̆r Tĕh đak tang găn jĭ Covid-19 găh minh ƀar tơdrong kăl kơchăng lơ̆m jang kiơ̆ tang găn jĭ hơbŭh Covid-19. Kiơ̆ kơ ‘nŏh, Dơnŏ anĭh tơm vei lăng jang pơgang, rim hơnĭh jang, tơring dăr lăng rim hla bơar pơrô̆ jang, nơ̆r pơtho tơbăt vă tơlĕch jang kiơ̆ tơ tom, ƀlep hăm khei ‘năr dang ei; ‘moi kiơ̆ tơdrong jĭ hơbŭh păng trong jang tang găn jĭ, pơtho tơbăt rim dêh char pơjing rim trong vă jang; tơtom tơroi tơbăt, tơbăt hơdăh dôm  tơmam drăm, kmăi kŏk, pơgang tơgŭm ăn tang găn jĭ vă rim tơring răt yua kiơ̆ trong “4 kơtă”; pơrô̆ pơgơ̆r hơlen hơdăh vaccine ƀlep tơchơ̆t; pơtho tơbăt, tơgŭm djru pơm hla bơar rim hơnĭh jang, hơnĭh mơdro sa răt dăh mă sơng iŏk vaccine ƀơk ăn. Atŏk kơtang bơ̆ jang tơroi tơbăt tơpăt, ƀlep pơjing đei lăp mĭnh đon, hơdrin tang găn jĭ lơ̆m tơpôl.

Tơblơ̆ nơ̆r: Amazưt