VOV4.Bahnar - Năr 27/9, Kơ iĕng Thủ tướng Vũ Đức Đam bơ̆ jang hăm Kơdră pơlei tơm Hồ Chí Minh găh bơ̆ jang tang găn jĭ hơbuh Covid-19, tơgop nơ̆r lơ̆m trong vă pơjing Nơ̆r athei jang kiơ̆ hơmet ming rim trong jang trŏ ƀlep, tang găn jĭ Covid-19 păng hơmet pơ ‘lơ̆ng jang mŭk drăm đơ̆ng năr 1/10.

Kơ iĕng Thủ tướng Vũ Đức Đam

Kơ iĕng Thủ tướng Tĕh đak pơma hơdăh, pơlei tơm Hồ Chí Minh kăl tơlĕch jang kơtang tơdrong jang tang găn jĭ, hơmet ming kơtang, ƀrư̆ ƀrư̆ hơmet pơ ‘lơ̆ng kơ jăp jang sa pơm tơlĕch tĕch mơdro, hrôih hơnhăk tơdrong erĭh sa kơ kon pơlei vĭh hơlơ̆k tơdrong erĭh sa ‘lơ̆ng hơ iă hle. Pơlei tơm kăl hrôih hơlen dơ̆ng tơdrong jĭ jăn lơ̆m tơring, mă kăl ‘măng khăm hơlen lơ bơngai ‘moi kiơ̆ nơ̆r pơrô̆ jang đơ̆ng Thủ tướng, đơ̆ng nŏh xơkơ̆t hơdăh tơdrong khăm hơlen lơ liơ, tơdrong chă tơpŏh tơ̆ tơring hơmơt tơpoh kơtang. Kơ iĕng Thủ tướng akhan, lơ̆m khei ‘năr plôih ‘măng dơ̆ng, Pơlei tơm kăl hơlen hơdăh trŭh iung jang hơmet pơ ‘lơ̆ng tơdrong jang kơ rim hnam kmăi, hơnĭh mơdro sa tĭh, hơnĭh jang kmăi kmŏk, mĭnh ƀar tơdrong jang mơdro sa kăl.

Tơblơ̆ nơ̆r: Amazưt