VOV4.Bahnar - Kơsơ̆ năr 2/8, tơ̆ Hơnĭh bơ̆ jang Khŭl kơdră chĕp pơgơ̆r Tĕh đak, Kơ iĕng Thủ tướng Vũ Đức Đam hop akŏm trư̆k tuyên hăm Kơdră chĕp pơgơ̆r pơlei tơm Hồ Chí Minh vă tơlĕch rim trong bơ̆ jang tang găn jĭ hơbŭh covid-19. Tơroi tơbăt tơ̆ hop akŏm, Kơdră chĕp pơgơ̆r Dơnŏ anĭh vei lăng kon pơlei kơ pơlei tơm Hồ Chí Minh Nguyễn Thành Phong tơbăt, Pơlei tơm hlôi tơlĕch jang kơ hret jang kiơ̆ Nơ̆r athei jang kiơ̆ 16 đơ̆ng Thủ tướng tĕh đak kiơ̆ trong jang “hơdăh-kơtang-kơjăp-jơnei”, sơđơ̆ng ăn jang kiơ̆ đĭ đăng lơ̆m pơlei tơm, sơkơ̆t hơdăh 7 khŭl đei ăn asong lĕch tơ̆ trong đơ̆ng 6 jơ gơmăng trŭh 6 jơ pơgê đơ̆ng rŏng. Tơ̆ hop akŏm, Kơ iĕng Thủ tướng Vũ Đức Đam athei Dơnŏ anĭh tơm vei lăng jang pơgang hơnơ̆ng ƀơk vaccine ăn kơ pơlei tơm Hồ Chí Minh vă hoei chă pơdơ̆h lơ̆m ƀet bơ̆ng. Kơ iĕng Thủ tướng Vũ Đức Đam athei pơlei tơm Hồ Chí Minh đei dôm trong jang kơtang hlŏh dơ̆ng vă vei kơ jăp tơring sơđơ̆ng, sơkơ̆t hơdăh tĕnh koăng tơring hơmơt tơpŏh jĭ jing tơring sơđơ̆ng tơ̆ rim kuân, apŭng. Dơnŏ anĭh chĕp pơgơ̆r pơma hơdăh, tơdrong ƀet vaccine ‘nŏh tơdrong đei iŏk yua păng hơnăp jang kơ rim bơngai hăm jơhngơ̆m pran jăng grăng akau ăn kơ dĭh păng pơlei pơla.

Tơblơ̆ nơ̆r: Amazưt