VOV4.Bahnar - Tơ̆ hop akŏm trư̆k tuyên hăm 2 dêh char Bắc Ninh păng Bắc Giang kơsơ̆ brei (7/6), Kơ iĕng Thủ tướng Vũ Đức Đam, Kơdră Dơnĭh chĕp pơgơ̆r Tĕh đak athei dêh char Bắc Ninh atŏk kơtang jơhngơ̆m đon kơchăng hăm hơnĭh jĭ hơbŭh ‘nao tơ̆ Kŏng ty AAC. Tơ̆ dêh char Bắc Ninh, đei 3 tơring oei đei ƀô̆h bơngai tơpŏh jĭ ‘nao Covid-19, ‘nŏh apŭng Thuận Thành, apŭng Quế Võ păng pơlei tơm Bắc Ninh. Tơ̆ hơnăp tơdrong au, apŭng Thuận Thành tơchĕng đei 58 pơlei gô jang đei tơplĭh đơ̆ng pơvang tang găn jing ăn oei hơdrô̆, Kơ iĕng Thủ tướng Vũ Đức Đam pơkă tơring ư̆h kơ gơ̆h pơhơi. Trŭh dang ei, tơ̆ dêh char Bắc Giang, hlôi tang găn kĕ tơdrong tơpŏh mư̆h khăm hơlen 5.800 ‘nu bơngai lơ̆m kon pơlei oei tơ̆ apŭng Việt Yên ư̆h kơ đei ƀô̆h sơmach jĭ. Kơ iĕng Thủ tướng Vũ Đức Đam pơma hơdăh, tơdrong vei lăng kơ jăp tơring ăn oei hơdrô̆ akŏm, tơring pơvang tang găn păng ăn oei hơtăih dĭh băl ‘nŏh tôch gĭt kăl, tơring ayơ khŭl kơdră đảng, kơdră chĕp pơgơ̆r tơring jang kiơ̆ ‘lơ̆ng rim tơdrong tơchơ̆t tang găn jĭ, atŏk kơtang jơhngơ̆m đon jang tơnăp ‘nŏh tơring ‘nŏh đei sơđơ̆ng dăh mă tơpŭh kĕ tơdrong jĭ jăn.

Tơblơ̆ nơ̆r: Amazưt