VOV4.Bahnar - Pơm tơm ‘măng hop akŏm Dơnŏ anĭh chĕp pơgơ̆r tĕh đak tang găn jĭ Covid-19 pơgơ̆r pơgê năr 10/5 tơ̆ Hơnĭh bơ̆ jang Khŭl kơdră chĕp pơgơ̆r Tĕh đak, Kơ iĕng Thủ tướng Vũ Đức Đam pơkă athei rim dêh char, pơlei tơm kăl lăng kơ jăp tang găn jĭ tơ̆ rim hơnĭh pơm tơlĕch tĕch mơdro tơmam drăm, hơnĭh jang kmăi kmŏk, hnam pơgang, kơchơ, hơnĭh tơm mơdro sa, mă kăl ‘nŏh mư̆h Dơnŏ anĭh tơm vei lăng jang pơgang hlôi tơchơ̆t hơdăh tơdrong tơpŏh jĭ tôch kơtang tơ̆ dôm hơnĭh hrĕp, kơdrơ̆m bơngai. Hrei au đei 26 dêh char, pơlei tơm lơ̆m tĕh đak tŏk bŏk đei tơdrong jĭ Covid-19. Jĭ hơbŭh oei hơnơ̆ng pơdui đunh, Dơnŏ anĭh vei lăng kon pơlei rim dêh char, pơlei tơm kăl atŏk kơtang dăr lăng, lăng hơlen, pơrô̆ athei rim hơnĭh pơm tơlĕch tơmam drăm lơm tơring jang kiơ̆ kơ jăp tơdrong tơchơ̆t đơ̆ng Dơnŏ anĭh chĕp pơgơ̆r Tĕh đak găh tơdrong pơtho tơbăt trong tang găn jĭ păng hơlen tơdrong hơmơt tơpŏh jĭ tơ̆ bơngai jang lơ̆m hơnĭh bơ̆ jang păng hơnĭh oei sa ăn bơngai jang. Hăm dôm hơnĭh hơmơt kơtang anai nhen: Hnam pơgang, kơchơ, hơnĭh tơm mơdro sa kăl pơm kiơ̆ kơ jăp rim tơdrong tơchơ̆t tang găn jĭ hlôi đei Dơnŏ anĭh tơm vei lăng jang pơgang pơtho tơbăt ăn.

Tơblơ̆ nơ̆r: Amazưt