VOV4.Bahnar- Pơgê năr 12/7, tơ̆ Hơnĭh bơ̆ jang Khŭl kơdră tĕh đak, Kơ iĕng Thủ tướng Vũ Đức Đam, Kơdră Dơnŏ anĭh chĕp pơgơ̆r tĕh đak tang găn jĭ Covid-19 pơm tơm hop akŏm trư̆k tuyên hăm kơdră chĕp pơgơ̆r pơlei tơm Hồ Chí Minh găh bơ̆ jang tang găn jĭ lơ̆m khei năr au. Tơ̆ jơ hop akŏm, Kơ iĕng Thủ tướng Vũ Đức Đam pơm ahơdăh: trŭh dang ei, rim hơnĭh ăn oei hơdrô̆ hlôi tơlĕch ăn 70% tơdrong kĕ jang. Kơ yuơ lơ lŏh pơlei tơm Hồ Chí Minh iung jang hơdoi hăm Dơnŏ anĭh tơm vei lăng jang pơgang tĕnh koăng tơlĕch jang ăn oei hơdrô̆ tơ̆ hnam. Kơ iĕng Thủ tướng pơjao ăn Dơnŏ anih tơm vei lăng jang Pơgang lăng hơlen păng chă tơchĕng rim tơdrong tơchơ̆t găh ăn oei hơdrô̆ lơ̆m hnam ƀlep hăm tơdrong đei ƀô̆h lơ̆m tơring. Kơ iĕng Thủ tướng pơkă athei pơlei tơm lăng kơ jăp trŭh bơngai dơnŭh, bơngai erĭh sa tơnap tap. Kiơ̆ kơ ‘nŏh, ‘ngoăih rim trong jang đơ̆ng khŭl kơdră tŏk bŏk tơlĕch jang ‘nŏh dơnŏ anĭh Măt trân Tổ quốc Việt Nam kăl krao hơvơn rim hơnĭh mơdro sa păng kon pơlei vang tơgŭm djru ăn dôm bơngai au.

Tơblơ̆ nơ̆r: Amazưt