VOV4.Bahnar - Kơsơ̆ năr 12/7, hop akŏm trư̆k tuyên hăm 12 dêh char Tơring tơmăn đak kroong Cửu Long găh bơ̆ jang tang găn jĭ Covid-19, Kơ iĕng Thủ tướng Vũ Đức Đam, Kơdră Dơnŏ anĭh chĕp pơgơ̆r Tĕh đak tang găn jĭ athei rim dêh char lơ̆m tơring iung jang kơtang hlŏh dơ̆ng hơmet ăn rim trong jang tang găn jĭ, lơ̆m au dăr lăng dơ̆ng tơdrong kĕ jang khăm hơmet jĭ đơ̆ng khŭl ƀok thây pơgang, rim hơnĭh ming hơmet jĭ jăn. Tơ̆ hop akŏm, rim kơdră chĕp pơgơ̆r rim dêh char (Tiền Giang, Bến Tre, Hậu Giang, Sóc Trăng, Đồng Tháp, Vĩnh Long, Trà Vinh, An Giang, Kiên Giang, Cà Mau, Bạc Liêu, Cần Thơ) tơroi tơbăt găh tơdrong jĭ Covid-19 lơ̆m dêh char. Kiơ̆ kơ ‘nŏh, măt bơngai tơpŏh jĭ SARS-CoV-2 roi vă kơtang hăm tơdrong tơpŏh mă găh lơ dôm bơngai brŏk đơ̆ng pơlei tơm Hồ Chí Minh. Rim dêh char tơroi tơbăt hơdăh mĭnh ƀar tơdrong tơnap tap lơ̆m tơlĕch jang kiơ̆ tang găn jĭ. Kơ iĕng Thủ tướng Vũ Đức Đam pơma hơdăh kăl pơrô̆ pơrôp pơtho tơbăt, krao hơvơn rim kon pơlei brŏk đơ̆ng pơlei tơm Hồ Chí Minh năm tơroi tơbăt hloi găh jơhngơ̆m jăn, chĭh hơnăn păng dăr lăng hơlen, khăm hơlen, hơlen kiơ̆ pơtôch khăm hơlen vă đei trong tơlĕch jang trŏ ƀlep. Kơ iĕng Thủ tướng athei dêh char Cần Thơ, dêh char đei Hnam trương Đăi hŏk Y Dược, hnam pơgang jang gơ̆h hơgei hơmet trong tơlĕch jang kơtang tơgŭm djru ăn rim dêh char lơ̆m tơring. Dơnŏ anĭh tơm vei lăng jang pơgang sơđơ̆ng khăm hơlen rim pham dôm bơngai đei jau jĭ ăn rim dêh char lơ̆m tơring Tơmăn đak kroong Cửu Long.

Tơblơ̆ nơ̆r: Amazưt