VOV4.Bahnar - Ưh đei tơ drong jang, ưh đei jên khei, athei tơ plih tơ drong jang ‘nŏh jĭ dôm tơ drong mă kô pơ tho mâm non tơ̆ hnam hŏk yoa kon pơ lei pơ jing kơ dih tơ̆ Dak Lak oei tơ ƀâp đơ̆ng rŏng đunh khei ‘năr jĭ Covid-19 tơ pŏh. Tơ drong vei lăng, gơ̆h jâng đe kô pơ tho ƀât mă ưh đei jên thu ‘nŏh kŭm jing tơ drong tôch mơ mat đơ̆ng anih pơ tho pơ hrăm mâm non đơ̆ng kon pơ lei pơ jing kơ dih tơ̆ tơ ring âu.

Vă jê̆ 10 sơ năm vei lăng hơ iŏh, kô Trần Thị Hải, tơ̆ Hnam trưng kon pơ lei pơ jing Tuổi thơ, tơ̆ phường Tân Tiến, plt Buôn Ma Thuột ưh đei tơ chĕng đei khei ‘năr athei pơ dơ̆h jang ưh đei jên khei đunh khei ‘năr. Ưh đei nhen đe thây kô pơ tho tơ̆ dôm hnam trưng tĕh đak pơ jing, đe thây kô pơ tho tơ̆ dôm hnam trưng yoa kon pơ lei pơ jing kơ dih nhen kô ưh iŏk đei tơ drong tơ gŭm kiơ đơ̆ng hnam trưng. Pơ dơ̆h pơ tho jing dang ưh đei jên khei. Vă vei lăng tơ drong arih xa, kô chă 1 tơ drong jang tĕch tơ mam online păng hơ mĕng jăh vih dơ̆ng hăm tơ drong jang vei lăng hơ iŏh roi hrôih roi ‘lơ̆ng.

Kô Trần Thị Hải tơ roi: “Đơ̆ng đe mon pơ dơ̆h vă tang găn jĭ truh dang ei đe kô pơ tho nhen ŏh kŭm pơ dơ̆h ‘năi. Hmă hmă rim kơ sô̆ jên răt tơ mam yoa gơ nơm đơ̆ng jên khei ngăl, dôm khei blŭng a oei gơ̆h pơ pơ̆, mưh đung ‘nŏh kŭm mơ mat tat tơ pă. Dang ei jang kiơ kŭm jang, gô lăng 1 khei ‘năr dơ̆ng hăm gơ̆h vih dơ̆ng tơ̆ hnam trưng ưh?”

Kô pơ tho tơ̆ Hnam trưng Mâm non Tây Nguyên, plt Buôn Ma Thuột, dêh char Dak Lak hơ met rơ gŏh lăm hŏk, tơ mam pơm ngôi kơ đe hơ iŏh lơ̆m khei ‘năr pơ dơ̆h yoa jĭ

Ưh lăp đe kô mơ mat tat đĕch mă hnam trưng, lăm hŏk đơ̆ng kon pơ lei pơ jing kơ dih kŭm tôch mơ mat tat mưh athei tang ‘măng pơ dơ̆h tho lơ khei. Kô Đồng Thị Thuận, Hiê̆u trơng Hnam trưng Mâm non Tây Nguyên, tơ̆ phương Thành Nhất, plt Buôn Ma Thuột, ăn tơ băt, hnam trưng oei “jĭ kơ̆l” hơ met pơ ‘lơ̆ng jên thu – jên tơ lĕch vă kĕ bơ̆ jang gô hlôi khei ‘năr mơ mat tat âu. Hnam trưng đei hlŏh 40 ‘nu kăn ƀô̆, thây kô, bơ ngai jang. Đe mon pơ dơ̆h hŏk, hnam trưng ưh đei jên thu mă lei oei adrin kla tôm kơ sô̆ jên kăl vă gơ̆h bơ̆ jang hơ nơ̆ng. Rim khei tơ ‘ngla anih pơ tho pơ hrăm athei kla dôm kơ sô̆ jên âu: jên tơm, jên kon đơ̆ng tŏk iŏk tơ̆ anih mong jên, nôp Ƀao hiêm tơ pôl, ƀao hiêm y tê̆, ƀao hiêm ưh đei tơ drong jang ăn đe kô, bơ ngai jang kiơ̆ tơ drong hơ găt.

Kô Đồng Thị Thuận pơ ngơ̆t: “Dôm khei ‘nâu hnam trưng ưh đei jên vă kla jên khei ăn đe kô, kơ na lơ kô tôch mơ mat tat. Hơ pơi ‘mĕh dôm anih jang kơ pal đei trong tơ gŭm hơ drô̆ ăn anih pơ tho pơ hrăm. Mă loi jĭ đe kô mâm non đei tơ gŭm hơ drô̆ vă pơ lung đe kô hơ nơ̆ng jang hăm hnam trưng, lăm hŏk mưh hŏk tro năm hŏk dơ̆ng. 1 tơ drong dơ̆ng, dôm kơ sô̆ jên tơ gŭm athei tơ lĕch mă hrĕnh ƀiơ̆ vă bơ ngai jang đei xa yoa hrôih ƀiơ̆ kơ plăh ƀât oei mơ mat tat yoa đơ̆ng jĭ hơ buh âu”.

Jơ̆p lơ̆m dêh char Dak Lak dang ei đei 70 hnam trưng mâm non yoa kon pơ lei pơ jing păng hlŏh 80 anih vei rong hơ iŏh yoa kon pơ lei pơ jing. Tơ drong hŏk jăl mâm non vei lăng ‘nŏh tơm kơ na hơ nat vă gơ̆h pơ gơ̆r hŏk trư̆k tuyê̆n. Hnam trưng tang ‘măng vă tang găn jĭ covid-19, đe kô pơ tho mâm non tơ̆ hnam trưng yoa kon pơ lei pơ jing ưh đei tơ drong jang, kơ na ưh đei jên khei kiơ.

Lơ kô pơ tho mâm non tơ̆ hnam trưng kon pơ lei pơ jing chă trong tĕch tơ mam online lơ̆m khei ‘năr dôm hnam trưng pơ dơ̆h vă tang găn jĭ

Găh tơ drong tơ gŭm ăn khul bơ ngai âu, ƀok Phạm Đăng Khoa, Kơ dră vei lăng pơ tho pơ hrăm dêh char Dak Lak ăn tơ băt: “Găh dôm tơ drong mơ mat tat hăm anih pơ tho pơ hrăm yoa kon pơ lei pơ jing, mă loi jĭ anih pơ tho mâm non, Dơ nŏ anih vei lăng kon pơ lei dêh char pơ tho ăn anih vei lăng pơ tho pơ hrăm dêh char chih jô̆ đe kô bơ̆ jang tơ̆ rim anih pơ tho pơ hrăm đơ̆ng kon pơ lei pơ jing hăm jăl mâm non vă roi tơ ƀôh ăn Dơ nŏ anih vei lăng kon pơ lei dêh char roi tơ băt ăn Khul kơ dră tĕh đak vă gơ̆h iŏk đei tơ drong tơ gŭm kiơ̆ tơ drong tơ chơ̆t 68 đơ̆ng Khul kơ dră tĕh đak, tơ dăh ưh đei tơ drong tơ gŭm đơ̆ng Khul kơ dră tĕh đak ‘nŏh dôm anih pơ tho pơ hrăm đơ̆ng kon pơ lei pơ jing, mă loi hăm jăl mâm non ưh kĕ pơ krơ̆ng đunh tơ dăh dôm hnam trưng athei tang ‘măng.”

Hăm dôm anih pơ tho mâm non đơ̆ng kon pơ lei pơ jing gĭt kăl, vang hơ met pơ ‘lơ̆ng tơ drong mơ mat tat hơ dai hăm anih pơ tho pơ hrăm mâm non đơ̆ng tĕh đak pơ jing, mă loi hăm dôm tơ ring đei kơ drâm kon pơ lei, atŭm hăm ‘nŏh tơ gop ‘lơ̆ng ăn tơ drong jang tơ pôl vang pơ jing anih pơ tho pơ hrăm kơ dih tơ̆ Dak Lak. Mă lei lơ̆m khei ‘năr đei jĭ Covid 19 oei tôch hơ mơt hrei ‘nâu, dôm anih pơ tho pơ hrăm mâm non đơ̆ng kon pơ lei pơ jing kơ dih kŭm hăm khul kô pơ tho oei tôch tơ nap tap hăm tơ drong chă jên “pơ ‘nhŏ ăn por sŏng, ‘nhot xa, hơ băn ao hrŭk” vă vei lăng sơ đơ̆ng tơ drong arih xa, bơ̆ jang tơ̆ hnam hŏk. Yoa thoi nŏh, dôm tơ drong tơ gŭm ăn anih pơ tho hŏk mâm non đơ̆ng kon pơ lei pơ jing găh tơ mam; ưh iŏk dăh mă tơ jur ƀiơ̆ thuê̆; asong tŏk jên hăm jên kon tŏ sĕt kăl đei tơ rĕk hlŏh dơ̆ng.

 Hương Lý: Chih

Dơ̆ng: Tơ blơ̆