VOV4.Bahnar  – Anih jang găh Rơvơ̆ng plenh Việt Nam (lơ̆m Anih jang hơlen Khoa hŏk păng kơmăi kơmŏk Việt Nam) ăn tơbăt: Kiơ̆ tơroi đơ̆ng Anih jang găh Rơvơ̆ng plenh teh đak Nhâ̆t (JAXA), khei năr tơpăr hơtŏk vê̆ tinh 'nao hơnăn NanoDragon “Made in Vietnam” kơyuơ dôm bơngai jang khoa hŏk kơ Anih jang Rơvơ̆ng plenh Việt Nam, lơ̆m Anih jang hơlen Khoa hŏk păng kơmăi kơmŏk Việt Nam pơm tơlĕch gô pơkăp ăh năr 7/10 âu kơnh đơ̆ng 7 jơ 51 pơnĭt truh 7 jơ 55 pơnĭt, đơ̆ng anih Tơpăr hơtŏk kơ Anih jang găh rơvơ̆ng plenh Uchinoura, teh đak Nhâ̆t. Vê̆ tinh NanoDragon jing vê̆ tinh đei Anih jang găh rơvơ̆ng plenh Việt Nam pơm tơlĕch. Đơ̆ng chă hơlen, pơm tơlĕch akŏm đei tơdrong 'lơ̆ng kơ vê̆ tinh noh đei pơm jang tơ̆ Việt Nam, kơyuơ kơ dôm kih sư hơlen kơ Anih jang găh rơvơ̆ng plenh Việt Nam. Vê̆ tinh NanoDragon đei hơtŏk hăm tơdrong vă hơlen tơdrong kăl băt kơ duk đak dơxĭ, iŏk yua vă hơlen duk vih vơ̆t tơ̆ đak dơxĭ. 'Nâu jing vê̆ tinh lơ̆m tơdrong hơtŏk Vê̆ tinh iĕ “Made in Vietnam” đơ̆ng Anih jang găh rơvơ̆ng plenh Việt Nam vă pơm kiơ̆ "Pơkăp hơtŏk păng iŏk yua khoa hŏk kơmăi kơmŏk rơvơ̆ng plenh teh truh xơnăm 2030" hlôi đei Thủ tướng Teh đak kĭ pơkăp ăh năr 04/02/2021.

Lan chih păng pơre nơ̆r