VOV4.Bahnar - Pơgê năr 8/10, tơ̆ apŭng Châu Thành, dêh char Tây Ninh, ƀok Nguyễn Trọng Nghĩa, Bí thư Trung ương Đảng, Kơdră chĕp pơgơ̆r ban Tuyên giáo Trung ương, kơdră tang măt Kuô̆k hô̆i dêh char Tây Ninh hlôi đei tơ ƀơ̆p pơma dơnŭh hăm bơngai tăh hla hơdrol pơgơ̆r hop akŏm mă 2, Kuô̆k hô̆i jăl XV. Tơ̆ tơ ƀơ̆o, bơngai tang măt Kuô̆k hô̆i Hoàng Thị Thanh Thuý, Kơ iĕng kơdră Khŭl tang măt Kuô̆k hô̆i dêh char Tây Ninh tơroi tơbăt tơdrong jang tang găn jĭ hơbŭh Covid-19 lơ̆m dêh char. Kiơ̆ kơ ‘nŏh, tơ̆ Tây Ninh, jĭ hơbŭh Covid-19 hlôi đei tang găn kĕ mălei oei tim mă sơđơ̆ng; dang ei dêh char tŏk bŏk atŏk kơtang ƀet vaccine, tơlĕch ‘lơ̆ng jang tơgŭm djru, rim tơdrong jang tơgŭm hơnĭh mơdro sa hơmet pơ ‘lơ̆ng jang sa ... Bơngai tăh hla athei atŏk kơtang bơ̆ jang pơrô̆ pơrôp, pơtho tơbăt vă kon pơlei ƀô̆h hơdăh tơdrong răm kơtang đơ̆ng jĭ hơbŭh pơrăm păng đei jơhngơ̆m đon kơchăng hlŏh dơ̆ng. Lơ̆m tơdrong tơgŭm djru ăn dôm bơngai đei ƀơm kơnê̆ đơ̆ng jĭ hơbŭh Covid-19 pơm ăn ‘nŏh kăl pơ̆ih să hlŏh dơ̆ng, kăl hơvơn tơpôl vang iung jang lơ̆m tơdrong răt vaccine vă tĕnh koăng hơmet pơ ‘lơ̆ng jang sa…

Tơblơ̆ nơ̆r: Amazưt