VOV4.Bahnar - Tơbăt 76 sơnăm năr Quốc khánh Tĕh đak Cộng hòa xã hội Chủ nghĩa Việt Nam (2/9/1945 - 2/9/2021), pơgê năr 1/9, Khŭl kơdră tang măt Dơnŏ anĭh chĕp pơgơ̆r Trung ương Đảng, Kơdră chĕp pơgơ̆r Tĕh đak, Kuô̆k hô̆i, Khul kơdră chĕp pơgơ̆r tĕh đak, Dơnŏ anĭh Trung ương Mặt trận Tổ quốc Việt Nam hlôi năm dŏng gơvang pơkao, mơ̆t hơpong Pơsat Ƀok Hô.

Hăm jơhngơ̆m ƀlŏk hơdơ̆r, hmach bơnê tôch bach hmach tôch kơ dêh, Khŭl kơdră tang măt hlôi tơbăt jơhngơ̆m đon yom kiơ̆, ƀlŏk hơdơ̆r tơdrong tơgop tĭh tên đơ̆ng Ƀok Hô hăm tơdrong jang kĕch mang kơ Đảng păng hơdrĕch hơdrung. Ƀok hlôi plang đĭ jơhnơr erĭh ăn kon pơlei, ăn tĕh đak, chông ba Đảng bơ̆n, kon pơlei bơ̆n iŏk đei jơnei tĭh tên, pơm hơdăh ang rang ‘lơ̆ng ăn hơdrĕch hơdrung bơ̆n, tĕh đak bơ̆n.

Gơvang pơkao đơ̆ng Khŭl đei nơ̆r chĭh "Ling lang ƀlŏk hơdơ̆r, hmach bơnê kơ Ƀok Hô nuih mơng gơ̆h hơgei”. Kiơ̆ đơ̆ng rŏng ‘noh, Khŭl kơdră tang măt Dơnŏ anĭh chĕp pơgơ̆r Trung ương Đảng, Kơdră chĕp pơgơ̆r Teh đak, Kuô̆k hô̆i, Khŭl kơdră Tĕh đak, Dơnŏ anĭh Trung ương Mặt trận Tổ quốc Việt Nam hlôi năm ming gơvang pơkao păng sŏh hlôt nhang ƀlŏk hơdơ̆r ăn rim Ƀô̆ nuih nuih mơng lôch dŏng tĕh đak tơ̆ Hơnĭh man tơbăt rim Ƀô̆ đô̆i nuih mơng lôch dŏng tĕh đak, trong Bắc Sơn, Hà Nội.

Tơblơ̆ nơ̆r: Amazưt