VOV4.Bahnar - Pơgê năr 15/10, Kơdră chĕp pơgơ̆r Dơnŏ anĭh bơ̆ jang Mŭk drăm Trung ương Trần Tuấn Anh hlôi sơng păng bơ̆ jang kơtă hăm Khŭl Jơnŭm jang mơdro sa Hoa Kỳ - ASEAN (USABC).

Rup jơ bơ̆ jang

Tơ̆ jơ bơ̆ jang, ƀar păh hlôi pơma dơnŭh dôm tơdrong tơm, trong jang ăn atŏk tơ iung mŭk drăm-tơpôl kơ Việt Nam, dôm nơ̆r apĭnh, athei lơ̆m rim tơdrong mă rim hơnih mơdro sa Hoa Kỳ lăng trŭh nhe jang pơgang, ŭnh hơyŭh, jên hu, mŭk drăm kơsô̆, khoa hŏk kmăi kmŏk, tơdrong tơgŭm djru hơnĭh mơdro sahơmet ming păng atŏk tơ iung đơ̆ng rŏng jĭ hơbŭh … Ƀok Trần Tuấn Anh athei roim Hơnĭh mơdro sa kơ Hoa Kỳ hơnơ̆ng pơ̆ih să hlŏh dơ̆ng tơdrong jang mơdro sa, tơmơ̆t jên jang tơ̆ Việt Nam, jang hơdoi hăm rim hơnĭh mơdro sa Việt Nam lơ̆m rim tơdrong mă păh Hoa Kỳ đei, jang gơ̆h păng Việt Nam ‘mĕh vă, tơgop hơmet pơ ‘lơ̆ng mŭk drăm đơ̆ng rŏng jĭ hơbŭh. Khŭl bơ̆ jang kơ Khŭl Jơnŭm mơdro sa Hoa Kỳ - ASEAN sơkơ̆t hơdăh gô hơnơ̆ng yak hơdoi păng iung jang hơdoi kơ jăp hăm Đảng, Khul kơdră Tĕh đak Việt Nam, hơdrin pơtrŭt kơtang jang hơdoi mŭk drăm-tơmơ̆t jên jang ƀar păh Hoa Kỳ păng Việt Nam roi năr roi atŏk tơ iung.

Tơblơ̆ nơ̆r: Amazưt