VOV4.Bahnar - Pơgê năr 15/11, Đại tướng Tô Lâm, Kơdră jang lơ̆m Dơnŏ anĭh tơm Chĭnh trĭ, Kơdră chĕp pơgơ̆r Dơnŏ anĭh tơm Kŏng ang hlôi bơ̆ jang hăm Kơdră dơnơm dêh char Điện Biên. Iung pơma tơ̆ jơ bơ̆ jang, Đại tướng Tô Lâm, Kơdră jang lơ̆m Dơnŏ anĭh tơm Chĭnh trĭ, Kơdră chĕp pơgơ̆r Dơnŏ anĭh tơm Kŏng ang hlôi hôn bơnê kơ tang dôm tơdrong mă dêh char Điện Biên iŏk đei lơ̆m khei năr au ki. Găh tơdrong jang kăl lơ̆m khei năr au kơnh, Đại tướng Tô Lâm athei dêh char Điện Biên hơnơ̆ng atŏk kơtang ming man rim tơdrong jang kăl, nhen Ming hơmet pơ ‘lơ̆ng Cham gre păr Điện Biên; tơ iung pơjing rim tơdrong vă jang atŏk tơ iung chŏh jang sa kmăi kmŏk hơgei; hơvơn tơmơ̆t jên jang atŏk tơ iung măk ka vă mĭnh păh trŏ lăp ăn pơtăm ‘long rim tĕh hŏh, adoi tơgŭm ăn bơngai jang đei tơdrong jang sa iŏk yua kơ jăp. Hrei au, tơdrong erĭh sa kơ kon pơlei oei tơ̆ tơring groi kông oei tơ ƀơ̆p tơnap; mĭnh ƀar tơring pơlei tim mă đei ŭnh hơyŭh tĕh đak, kơ yuơ lơ lŏh dêh char Điện Biên kăl iung jang kơtang hlŏh dơ̆ng lơ̆m tơlĕch jang rim tơdrong vă jang lăng trŭh tơ̆ tơring, lăng trŭh tơdrong erĭh sa kơ kon pơlei, hơnhăk đei phĭ tơtŏ dơnŏ ‘lơ̆ng dơ̆ng kơ jăp ăn kon pơlei.

Tơblơ̆ nơ̆r: Amazưt