VOV4.Bahnar - Tơ̆ Hà Nội, Đại tướng Tô Lâm, Kơdră jang lơ̆m Dơnŏ anih tơm Chĭnh trĭ, Kơdră chĕp pơgơ̆r Dơnŏ anih tơm Kŏng ang hlôi sơng pơma dơnŭh hăm Kơdră chĕp pơgơ̆r Dơnŏ anĭh tơm jang tơbôl jang hloi Kơdră chĕp pơgơ̆r Khŭl drŏ kăn Australia Marise Payne tŏk bŏk năm tơmang păng bơ̆ jang tơ̆ Việt Nam. Tơ̆ jơ sơng, ƀok Tô Lâm pơma hơdăh, hăm tơrong tơgŭm djru đơ̆ng Dơnŏ anih tơm jang Tơbôl Australia, tơdrong tơgoăt tơgoăl jang hơdoi ƀar păh Dơno anĭh tơm Kŏng ang Việt Nam hăm rim hơnĭh bơ̆ jang kiơ̆ khôi luơ̆ Australia hlôi atŏk kơtang ‘lơ̆ng hơ iă lơ̆m tơdrong tang găn hơlau, tơ jră tang găn khŭl yoch, vei lăng mơ̆t lĕch, tơgŭm djru dĭh băl tư phap ... Ƀar păh jei hơnơ̆ng pơgơ̆r ăn rim khŭl pơma dơnh dĭh băl găh tơdrong vei lăng mơ̆t lĕch, jang hơdoi hơlen băt hơdăh kơtơ̆ng ang, phă pơrăm khŭl ba đe mơ̆t oei glăi, pơrô̆ pơrôp tang găn hơlau đe kơdau jăk mơ̆t oei glăi… Vă atŏk kơtang hlŏh dơ̆ng tơgoăt tơgoăl jang hơdoi ƀar păh tĕh đak pơma atŭm, ƀar păh Dơnŏ anĭh tơm Kŏng ang Việt Nam hăm rim hơnĭh jang hơdoi Australia pơma hơdrô̆, ƀok Tô Lâm athei ƀar păh hơnơng atŏk kơtang jang hơdoi găh mơdro sa, tơmơ̆t jên jang vă tơgŭm djru vang hơmet pơ ‘lơ̆ng kơ jăp đơ̆ng rŏng jĭ hơbŭh Covid-19; atŏk kơtang jang hơdoi, hơnơ̆ng jang kiơ̆ jơnei Tơdrong jang tơlĕch tơgoăt tơgoăl jang hơdoi gĭt kăl Việt Nam – Australia jăl 2020 – 2023….

Tơblơ̆ nơ̆r: Amazưt