VOV4.Bahnar - Ƀlep lơ̆m năr tơbăt 40 sơnăm Năr pơjing Khŭl lui Phât Việt Nam (7/11), pơgê năr 5/11, tơ̆ Hà Nội, tang măt ăn Kơdră chĕp pơgơ̆r Đảng, Tĕh đak, MTTQ Việt Nam, ƀok Đỗ Văn Chiến, Bí thư Trung ương Đảng, Kơdră chĕp pơgơ̆r Trung ương MTTQ Việt Nam atŭm hăm khul bơ̆ jang hlôi năm ngôi păng hmach chơt hơ iă ăn Khŭl lui phât Việt Nam.

Ƀok Đỗ Văn Chiến sơkơ̆t hơdăh, hloh 40 sơnăm au ki, Khŭl lui Phât Việt Nam chă hơvơn đĭ đăng bơngai lui phât lơ̆m tĕh đak akŏm atŏk tơ iung mŭk drăm-tơpôl, vei lăng năng tông tơdrong erĭh sa ăn dôm bơngai tơnap tap, bơngai tơ ƀơ̆p tơdrong răm đơ̆ng tŏ ‘mi kial, jĭ hơbŭh pơrăm. Bơnê jơhngơ̆m đon lăng ba kơ jăp đơ̆ng kơdră chĕp pơgơ̆r Đảng, Tĕh đak, MTTQ Việt Nam hăm rim tơdrong jang kơ Khŭl lui Phât khei năr au ki, Hòa thượng Thích Thanh Nhiễu-Kơ iĕng Kơdră chĕp pơgơ̆r Khŭl chĕp pơgơ̆r Trung ương Khŭl lui phât Việt Nam sơkơ̆t hơdăh lơ̆m khei năr kơnh, Khŭl lui Phât Việt Nam hơnơ̆ng pơrô̆ pơrôp rim bơngai lui phât “erih sa ‘lơ̆ng, lui kơ jăp”, pơm kiơ̆ ƀlep rim trong tơlĕch jang đơ̆ng Đảng, Khôi luơ̆t Tĕh đak, kơrŭn, hơdrin đĭ jơhngơ̆m jang tơdrong ‘mêm mơnat vă tơgum djru dôm bơngai dơnŭh, kon pơlei tơ̆ tơring tŏk bŏk răm đơ̆ng jĭ hơbŭh Covid-19 pơm ăn.

Tơblơ̆ nơ̆r: Amazưt