VOV4. Bahnar - Pơgê năr 26-4, ƀok Phan Diễn - Kơdră chĕp pơgơ̆r Hơnĭh mong jên tơpôl tang găn tŏ ‘mi kial pơrăm găh (Hơnĭh tơm chă tơchĕng Mŭk drăm bri brăh păng Cham char kơ Hnam trương Đăi hŏk Quốc gia Hà Nội) pơm tơm khŭl bơ̆ jang hlôi đei jơ bơ̆ jang hăm dêh char Gia Lai găh mĭnh ƀar tơdrong lơ̆m bơ̆ jang vei lăng năng tông păng atŏk tơ iung bri.

Khŭl bơ̆ jang kơ Hơnĭh mong jên tơpôl tang găn tŏ ‘mi kial pơrăm bơ̆ jang hăm dêh char Gia Lai

Tơbăt tơ̆ jơ bơ̆ jang đei ƀô̆h, 5 sơnăm au ki, hơgăt tĕh pơtăm ‘long bri tơ̆ Gia Lai đei 25.000 ha. Trŭh đĭ sơnăm 2020, ‘long hơ yơ̆l tĕh tơ̆ dêh char au jơnei 46,7%; bơ̆ jang vei lăng năng tông bri, tang găn ŭnh sa, pĭt ŭnh sa đei lăng ba kơ jăp. Iung pơma tơ̆ jơ bơ̆ jang, ƀok Phan Diễn - Kơdră chĕp pơgơ̆r Hơnĭh mong jên tơpôl tang găn tŏ ‘mi kial pơrăm tơbăt jơhngơ̆m vang mơnat hăm tơring găh dôm tơdrong tơnap tap tŏk bŏk tơ ƀơ̆p. Hơnĭh mong jên au gô tơgŭm dêh char pơjing trong vă jang tơgŭm djru ăn kon pơlei tơ̆ mĭnh ƀar tơring pơtăm ‘long bri đunh khei ‘năr tơplĭh ăn pơtăm ‘long iĕ ƀônh kŏh iŏk; dăh mă pơtăm hrau lơ̆m mir pơgar chehphe vă đei iŏk yua kơ jăp, adoi pơm ăn vei lăng năng tông tĕh ‘lơ̆ng. Mă lei, dêh char jei kăl tơgŭm jru tơdrong erĭh sa ăn kon pơlei lơ̆m khei ‘năr ‘long oei iĕ vă đe sư sơđơ̆ng jơhngơ̆m vei lăng năng tông bri păng pơđunh khei ‘năr bri jang sa.

Tơblơ̆ nơ̆r: Amazưt