VOV4.Bahnar -   Lơ̆m ‘măng iung năm tơmang păng bơ̆ jang tơ̆ rim dêh char Tây Nguyên, kơsơ̆ brei năr 30/6, Kơdră chĕp pơgơ̆r Kuô̆k hô̆i Vương Đình Huệ hăm Khŭl bơ̆ jang hlôi bơ̆ jang hăm Kơdră chĕp pơgơ̆r dêh char Dak Lăk.

Bơ̆ jang hăm Kơdră chĕp pơgơ̆r dêh char Dak Lăk, Kơdră chĕp pơgơ̆r Kuô̆k hô̆i drơ̆ng nơ̆r hăm rim trong tơlĕch jang kơ dêh char tơlĕch ăn lơ̆m 6 khei hơtuch sơnăm păng pơma hơdăh, dêh char kăl hơnơ̆ng tơlĕch jang kiơ̆ kơ jăp ‘lơ̆ng tơdrong tơchơ̆t đơ̆ng Đảng, Dơnŏ anĭh Đảng dêh char; dăr lăng kơ jăp tơdrong jĭ hơbŭh Covid-19 vă đei trong hơmet pơ ‘lơ̆ng, adoi atŏk kơtang iung jang tang găn jĭ đơ̆ng hrôih păng đơ̆ng atăih, ư̆h kơ gơ̆h pơhơi, dăr lăng dơ̆ng 4 trong jang kơtă ‘nŏh khŭl jang, tơmam drăm, kmăi kmŏk, jang pơgang vă hoei đei tơdrong ư̆h kơ măh ê, ư̆h kơ tom băt.

Lơ̆m ‘măng năm bơ̆ jang tơ̆ dêh char Dak Nông, Kơdră chĕp pơgơ̆r Kuô̆k hô̆i hlôi năm ngôi, pôk tơmam drăm ăn kŏng nhan tơnap tap găh kŏng ty nhôm Alumin, tơring Nhơn Cơ, apŭng Dak Rlâp; năm tơmang Hơnĭh jang kmăi kmŏk pơm tơlĕch alumin Nhân Cơ - Dak Nông.

Tơblơ̆ nơ̆r: Amazưt