VOV4.Bahnar -  Iung pơma tơ̆ jơ bơ̆ jang hăm Dơnŏ anĭh dăr lăng hơlen jên hu Tĕh đak kơsơ̆ năr 12/8, Kơdră chĕp pơgơ̆r Kuô̆k hô̆i Vương Đình Huệ athei, tơdrong tơm lơ̆m sơnăm 2022 kơ Dơnŏ anĭh dăr lăng hơlen jên hu tĕh đak ‘nŏh jang kiơ̆ tơdrong tơroi tơbăt pơtôch bơ̆ jang đei ƀơm trŭh pơm kiơ̆ pơkom, tang găn brăh brư jăl jang đơ̆ng sơnăm 2016-2021 lơ̆m rim tơdrong jang nhen mŭk drăm jên hu tĕh đak, mŭk drăm lơ̆m tĕh, groi tĕh. Hôn bơnê kơtang hơnăp jang đơ̆ng Dơnŏ anĭh jang hơlen jên hu tĕh đak lơ̆m khei năr au ki, Kơdră chĕp pơgơ̆r Kuô̆k hô̆i Vương Đình Huệ akhan, dơnŏ anĭh bơ̆ jang hơlen hlôi tơgoăt iŏk dôm trong jang ‘lơ̆ng hơ iă đơ̆ng apŭng plĕnh tĕh, tơmơ̆t jang kiơ̆ trŏ lăp tơ̆ Việt Nam, bơ̆ jang hơlen roi năr roi ‘lơ̆ng hơ iă, jing hơnĭh hơlen mŭk drăm jên hu tĕh đak bơ̆ jang ‘lơ̆ng. Khei năr kơnh, Kơdră chĕp pơgơ̆r Kuô̆k hô̆i Vương Đình Huệ athei, khŭl kơdră chĕp pơgơ̆r Đảng Dơnŏ anĭh dăr lăng hơlen mŭk drăm jên hu tĕh đak kăl tơ iung pơjing Tơdrong vă jang pơgơ̆r atŏk kơtang bơ̆ jang hơgei, jơnei lơ̆m bơ̆ jang dăr lăng hơlen Tĕh đak, pơjao trong jang atŏk tơ iung bơ̆ jang hơlen mŭk drăm jên hu tĕh đak trŭh sơnăm 2030, pơlăp lơ̆m jang kiơ̆ Tơdrong tơchơ̆t ‘măng mă 13 păng rim Tơdrong Tơchơ̆t đei ƀơm trŭh lơ̆m 5 sơnăm trŭh au kơnh.

Tơblơ̆ nơ̆r: Amazưt