VOV4.Bahnar - Tơ̆ kơsơ̆ năr 22/11, tơ̆ Hnam Kuô̆k hô̆i hlôi pơgơ̆r Pơm lêh pôk ăn 40 sơnăm jang Đảng, pôk ăn hla bơar tơchơ̆t pơdơ̆h jang sơnăm ‘lŏ kră đơ̆ng Dơnŏ anĭh tơm Chĭnh trĭ hăm rim Kơdră bơ̆ jang lơ̆m Trung ương Đảng jăl XII tơ̆ Kuô̆k hô̆i păng pôk ăn Mê đai hăm rim kơdră tang măt Kuô̆k hô̆i tơ̆ Trung ương jăl XIV ư̆h kơ chĭh hơnăn ăn pôk tơmơ̆t pơm kơdră tang măt jăl XV. Tơ̆ pơm lêh, Kơdră chĕp pơgơ̆r Kuôk hô̆i Vương Đình Huệ pôk ăn Huy hiệu 40 sơnăm jang Đảng păng pôk ăn pơkao hmach bơnê ăn Kơdră so chĕp pơgơ̆r Kuô̆k hô̆i Nguyễn Thị Kim Ngân; Kơ iĕng kơdră so chĕp pơgơ̆r Kuô̆k hô̆i Tòng Thị Phóng. Tang măt ăn Kơdră chĕp pơgơ̆r Đảng, Tĕh đak, Kơdră chĕp pơgơ̆r Kuô̆k hô̆k Vương Đình Huệ pôk ăn Mê đai jơnei rơngei dơ̆ng mă ƀar pôk ăn 8 ‘nu kơdră păng Mê đai jơnei rơngei dơ̆ng mă pêng pôk ăn 7 ‘nu kơdră. Kơdră chĕp pơgơ̆r Kuô̆k hô̆i Vương Đình Huệ pơma hơdăh, rim kơdră sơng iŏk hla bơar tơchơ̆t pơdơ̆h jang sơnăm ‘lŏ kră păng đei pôk ăn Mê đai đơ̆ng Tĕh đak ‘măng mă au hlôi bơ̆ jang gơ̆h hơgei, iŏk chĕp pơgơ̆r lơ tơdrong jang phara dĭh băl, lơ hơnăp jang kăl kơ tĕh đak, lơ̆m khei ‘năr hŏk pơhrăm, hơdrin iung jang đơ̆ng rim kơdră au jing trong ‘lơ̆ng vă rim jơhnơr kiơ̆ yok rok jơ̆ng hŏk pơhrăm jang kiơ̆.

Tơblơ̆ nơ̆r: Amazưt