VOV4.Bahnar - Kơsơ̆ năr 17/12, tơ̆ Hơnĭh bơ̆ jang Jơnŭm jang tơbôl Ấn Độ, Kơdră chĕp pơgơ̆r Kuô̆k hô̆i Vương Đình Huệ hăm Khul kơdră kơpal Việt Nam hlôi vang năm Pơm lê̆h tơbăt 5 sơnăm pơjing Tơbôl jang hơdoi Gĭt kăl Tôm tong ƀar păh Việt Nam păng Ấn Độ.

Kơdră chĕp pơgơ̆r Dơnŏ anĭh tơm jang tơbôl Ấn Độ sơkơ̆t hơdăh Việt Nam păng Ấn Độ đei tơdrong tơgoăt tơgoăl dih băl kơ jăp, ling lang lui yom dĭh băl, atŏk tơ iung jang hơdoi lơ̆m lơ tơdrong ư̆h kơ mơ̆ng bri dôm tơdrong tơhlăk tơhlĭn, tơdrong long. Ƀar tĕh đak oei đei lơ tơdrong kăl jang hơdoi lơ̆m tơdrong jang joăt joe đơ̆ng sơ̆ nhen jŏh ayŏ, pơtho pơhrăm păng kon pơlei yak ngôi năm ngôi dih băl. Iung pơma tơ̆ Pơm lê̆h, Kơdră chĕp pơgơ̆r Kuô̆k hô̆i Vương Đình Huệ athei ƀar tĕh đak lơ̆m khei năr kơnh jang hơdoi kơ jăp hlŏh dơ̆ng Tơdrong jang 2021-2023 tơlĕch tơgoăt tơgoăl jang hơdoi gĭt kăl tôm tong păng Lăng atŭm trŭh tơdrong Rơngei hiôk hian, Pơdrŏng păng kon pơlei hlôi đei pơdrơ̆ng kiơ̆ lơ̆m khei 12/2020 vă hơnơ̆ng atok kơtang hlŏh dơ̆ng tơgoăt tơgoăl ‘lơ̆ng hơ iă hrei au kơ ƀar tĕh đak.

Tơblơ̆ nơ̆r: Amazưt