VOV4.Bahnar - Lơ̆m ‘măng bơ̆ jang hăm rim dêh char găh Hơlĕch Tu, năr 5/5, Kơdră chĕp pơgơ̆r Kuô̆k hô̆i Vương Đình Huệ, Kơdră chĕp pơgơ̆r Jơnŭm vei lăng Pôk rơ̆ih Tĕh đak atŭm hăm Khŭl bơ̆ jang kơ Kuô̆k hô̆i hlôi dăr lăng bơ̆ jang hơmet ăn pôk rơ̆ih Kơdră tang măt Kuô̆k hô̆i jăl XV, Kơdră tang măt Jơnŭm vei lăng kon pơlei jăl jang 2021-2026 tơ̆ tơring tăh hla kơsô̆ 4, thôn Thèn Pả, tơring Lũng Cú, apŭng Đồng Văn păng bơ̆ jang hăm Kơdră chĕp pơgơ̆r dêh char, Dơnŏ anĭh bơ̆ jang Pôk rơ̆ih dêh char Hà Giang; năm ngôi, pơma dơnuh hăm kang ƀô̆ Kơđông ƀô̆ đô̆i vei lăng Sơlam tĕh đak Lũng Cú. Iung pơma tơ̆ jơ bơ̆ jang, Kơdră chĕp pơgơ̆r Kuô̆k hô̆i Vương Đình Huệ pơkă athei dêh char Hà Giang, lơ̆m mă hơmet ăn bơ̆ jang pôk rơ̆ih, mă lei kăl vei lăng năng tông atŏk tơ iung mŭk drăm, tơpôl, sơđơ̆ng vei lăng tĕh đak, sơđơ̆ng tơpôl. Lơ̆m bơ̆ jang pơgơ̆r vă bơngai đei hơnăn ăn pôk tơmơ̆t năm tơ ƀơ̆p pơma dơnŭh hăm bơngai tăh hla, Kơdră chĕp pơgơ̆r Kuô̆k hô̆i Vương Đình Huệ pơkă, rim bơngai đei hơnăn ăn pôk tơmơ̆t pơm kơdră tang măt Kuô̆k hô̆i tơ̆ Trung ương mă đei ăn chĭh hơnăn ăn tơring pôk tơmơ̆t, lơ̆m 1-2 năr kơnh, khăm lăng hơlen hơdrol vă tơƀơ̆p pơma dơnŭh hăm bơngai tăh hla, sơđơ̆ng ‘lơ̆ng hơ iă lơ̆m bơ̆ jang tang găn jĭ.

Tơblơ̆ nơ̆r: Amazưt