VOV4.Bahnar - Tơ̆ Hơnĭh tơm Viên, tĕh đao Áo, Kơdră chĕp pơgơ̆r Kuô̆k hô̆i Vương Đình Huệ hlôi đei tơ ƀơ̆p 6 ‘nu kơdră tang măt Việt Nam tơ̆ châu Âu ‘nŏh đei: Kơdră tang măt Việt Nam tơ̆ Séc; Kơdră tang măt Việt Nam tơ̆ Slovakia; Kơdră tang măt Việt Nam tơ̆ Hungary; Kơdră tang măt Việt Nam tơ̆ Ba Lan; Kơdră tang măt Việt Nam tơ̆ Áo jang hloi Kơdră tang măt tơ̆ Slovenia păng Kơdră tang măt Việt Nam tơ̆ Đức. Tơ̆ ‘măng tơ ƀơ̆p, rim Kơdră tang măt hlôi tơroi tơbăt tơdrong erĭh sa kơ bơngai Việt Nam tơ̆ rim tĕh đak au. Mă kăl tơdrong jĭ hơbŭh Covid-19 tơ̆ châu Âu pơrăm kơtang lơ̆m sơnăm 2020, kơna kon pơlei tơ ƀơ̆p lơ tơdrong tơnap tap lơ̆m mơdro sa păng erĭh sa. Rim Kơdră tang măt jei vang chă tơgŭm djru ăn kon pơlei Việt Nam oei tơ̆ dôm tĕh đak au băt vao trong tang găn hơlau, ling lang lăng ba tơ̆ tĕh đak, hơdrin tơgŭm djru hơnĭh mong răk vaccine tang găn jĭ Covid-19, tơgŭm djru kon pơlei răm đơ̆ng tŏ ‘mi kial pơrăm. Kon pơlei oei tơ̆ tĕh đak Séc hlôi tơgŭm ăn Hơnĭh mong răk vaccine 1 ti 500 trĭu hlak jên, kon pơlei oei tơ̆ tĕh đak Đức tơgŭm ăn 50.000  Euro. Kơdră chĕp pơgơ̆r Kuô̆k hô̆i Vương Đình Huệ athei rim Kơdră tang măt tĕh đak hơnơ̆ng lăng ba trŭh tơdrong erĭh sa, oei sa kơ kon pơlei, athei rim Kơdră tang măt hơnơ̆ng hơdrin hlŏh dơ̆ng, pơgĕnh tơdrong đei, tơplĭh dăh mă răt vaccine tang găn jĭ Covid-19.

Tơblơ̆ nơ̆r: Amazưt