VOV4.Bahnar - Kơsơ̆ năr 4/8, tơ̆ Hà Nôị, Kơdră chĕp pơgơ̆r Kuô̆k hô̆i Vương Đình Huệ hlôi pơm tơm tơ ƀơ̆p mŭh măt kang ƀô̆ ƀok thây pơgang rim hnam pơgang Trung ương ăn năm bơ̆ jang tơ̆ pơlei tơm Hồ Chí Minh păng rim dêh char găh Pơbăh tang găn jĭ Covid-19.

Tang măt ăn kơdră chĕp pơgơ̆r Đảng păng Tĕh đak iung pơma tơ̆ jơ tơ ƀơ̆p, Kơdră chĕp pơgơ̆r Kuô̆k hô̆i Vương Đình Huệ pơma tơbăt jơhngơ̆m chơt hơ iă đei tơ ƀơ̆p rim ƀok thây pơgang tang măt ăn vă jê̆ 3.000 ‘nu ƀok thây pơgang hơmet ăn vă iung năm bơ̆ jang tang găn jĭ Covid-19 ăn pơlei tơm Hồ Chí Minh păng rim dêh char găh Pơbăh. Kơdră chĕp pơgơ̆r Kuô̆k hô̆i Vương Đình Huệ hmach ăn kang ƀô̆, ƀok thây pơgang hơnơ̆ng lang să jơhngơ̆m đon ƀok thây pơgang gơ̆h găt băt ‘mêm kơ eng vă vei lăng năng tông, ming hơmet ăn bơngai jĭ, tơgop atŭm hăm rim dêh char, pơlei tơm găh Pơbăh tang găn kĕ jĭ hơbŭh, hrôih jang keh đang trong tơlĕch jang, vă brŏk vĭh hăm ŭnh hnam; adoi lui akhan, hăm tơdrong vang iung jang pơ đĭ khŭl chĭnh trĭ, rim dêh char, pơlei tơm găh Pơbăh gô hrôi vĭh hơ lơ̆k erĭh sa hiôk hian đêl so dơ̆ng.

Tơblơ̆ nơ̆r: Amazưt