VOV4.Bahnar - Năr 6/9, tơ̆ Hơnĭh bơ̆ jang vei lăng Mơdro dsa Áo, Hơnĭh tơm Viên hlôi pơgơ̆r Hop akŏm hơnĭh mơdro sa Việt - Áo kơ yuơ Dơnŏ anĭh tang măt Việt Nam, Dơnŏ anĭh tơm Pơ prŏ tơdrong jang-Tơmơ̆t jên jang păng Hơnĭh bơ̆ jang vei lăng Mơdro sa mŭk drăm Cộng hòa Áo vang chĕp pơgơ̆r. Lơ hơnĭh mơdro sa Việt Nam păng tang măt ăn hlŏh 20 hơnĭh mơdro sa lơ̆m tơdrong jang jên hu, hơnĭh mong jên, hơnĭh jang pơgang, hơnĭh jang tơbăt, trong nơnăm, hơnĭh jang găh gre, hơnĭh jang tơmam drăm vei lăng sơđơ̆ng, tang găn ŭnh sa, hơmet pơ ‘lơ̆ng rơ̆m rĕk jang pơgang, hơmet pơ ‘lơ̆ng mam pơsei, mơdro sa, khôi luơ̆t, hơnĭh jang gre păr, ŭnh hơyŭh vang năm hop akŏm. Iung pơma tơ̆ pơgơ̆r Hop akŏm, Kơdră chĕp pơgơ̆r Kuô̆k hô̆i Vương Đình Huệ pơma hơdăh, Việt Nam ‘mĕh vă, tơpôl hơnĭh mơdro sa kơ Áo, Hơnĭh vei lăng mơdro sa kmăi kmŏk pơm tơlĕch tơmam drăm đei nơ̆r pơma kơtang vă hrô̆ih kĭ pơkăp Tơdrong tơchơ̆t sơđơ̆ng tơmơ̆t jên jang. Hrei au, Áo đei 37 tơdrong vă jang hăm akŏp kon jên tơmơ̆t jang dang 150 trĭu dolar, akŏm găh lơ lơ̆m tơdrong jang kmăi kmŏk pơm tơlĕch tơmam drăm păng khoa hŏk kmăi kmŏk. Găh tơgoăt tơgoăl mơdro sa, Áo ling lang jing mĭnh lơ̆m dôm tĕh đak tĕch mơdro tơm tơmam drăm Việt Nam păng dang ei lơ̆m khŭl 5 tĕh đak mă Việt Nam tĕch mơdro tơmam drăm lơ hlŏh lơ̆m khŭl EU. Kơdră chĕp pơgơ̆r Kuô̆k hô̆i Vương Đình Huệ jei ‘mĕh vă, Hơnĭh mơdro sa kơ Áo tơgŭm djru vă Khŭl kơdră tĕh đak Áo tơgŭm tĕch ăn vaccine, rim tơmam drăm kmăi kmŏk jang pơgang, tơgŭm ăn Việt Nam tang găn jĭ hơbŭh.

Tơblơ̆ nơ̆r: Amazưt