VOV4.Bahnar - Năm ngôi păng pôk tơmam drăm ăn kŏng nhân, bơngai jang tơ ƀơ̆p tơnap tap kơ yuơ đei ƀơm kơnê̆ đơ̆ng jĭ hơbuh Covid-19, Kơdră chĕp pơgơ̆r Kuô̆k hô̆i Vương Đình Huệ hôn bơnê kơ tang tơdrong hơdrin đơ̆ng kŏng đoan lơ̆m dêh char Dak Lăk mă đơ̆ng tơnap tap, mă lei hlôi pơgơ̆r lơ tơdrong jang tơgŭm tơpôl ‘lơ̆ng hơ iă, vei lăng năng tông rim bơngai lơ̆m kŏng đoàn ư̆h khan lăp hơdrô̆ lơ̆m dêh char mă lei oei vang chă tơgop tơgŭm, hơlêm jơhngơ̆m đon ăn bơngai jang dêh char Bắc Giang, Bắc Ninh ... ‘Nau jing dôm tơdrong jang tôch gĭt kăl ‘lơ̆ng hơ iă, ƀĕnh ƀang jơhngơ̆m đon ‘mêm mơnat, tơgop hơlêm rim bơngai jang, mă kăl bơngai đei tơdrong erĭh sa mơmat tat chơ̆n jơhngơ̆m lui tơ̆ hơnăp kĕ yak hlŏh mơmat tat, hơdrin jang sa.

Kơdră chĕp pơgơ̆r Kuô̆k hô̆i pôk tơmam drăm ăn rim kŏng nhân, bơngai jang tơ ƀơ̆p tơnap tap

Kơdră chĕp pơgơ̆r Kuô̆k hô̆i Vương Đình Huệ hôn bơnê rim hơnĭh kŏng đoan Dak Lăk păng tơdrong vang chă tơgŭm tơgop đơ̆ng rim bơngai bơ̆ jang, khŭl mơdrpo sa. Ƀlep lơ̆m jơ ‘năr au, Kơdră chĕp pơgơ̆r Kuô̆k hô̆i Vương Đình Huệ, Tổng Thư ký Quốc hội, Kơdră chĕp pơgơ̆r Hơnĭh bơ̆ jang Kuô̆k hô̆i Bùi Văn Cường păng rim bơngai lơ̆m Khŭl bơ̆ jang hlôi pôk ăn 50 tơnô̆ tơmam drăm pôk ăn rim kŏng nhân, bơngai jang tơ ƀơ̆p tơnap tap kơ yuơ đei ƀơm kơnê̆ đơ̆ng jĭ hơbŭh Covid-19.

Tơblơ̆ nơ̆r: Amazưt