VOV4.Bahnar - Kơsơ̆ năr 15/12, Kơdră chĕp pơgơ̆r Kuô̆k hô̆i Vương Đình Huệ păng Khŭl kơdră tang măt Kuô̆k hô̆i tĕh đak bơ̆n hlôi trŭh tơ̆ cham gre păr khŭl lĭnh  Palam, New Delhi, iung năm tơmang Ấn Độ kiơ nơ̆r krao hơvơn đơ̆ng Kơdră chĕp pơgơ̆r Hạ viện Cộng hòa Ấn Độ Om Birla păng Kơdră chĕp pơgơ̆r Thượng viện Cộng hòa Ấn Độ Venkaiah Naidu, đơ̆ng năr 15 - 19/12/2021.

Sơng khŭl tơ̆ cham gre păr păh Ấn Độ đei Kơdră chĕp pơgơ̆r Dơnŏ anĭh bơ̆ jang tơbôl hăm tĕh đak đe kơ Hạ nghị viện Shri P P Chaudhary atŭm hăm mĭnh ƀar ‘nu Thượng nghị sỹ, Hạ nghị sĩ, kơdră chĕp pơgơ̆r Hơnĭh bơ̆ jang Kuôk hô̆i, kang ƀô̆ bơ̆ jang Hơnĭh chĕp pơgơ̆r Kuô̆k hô̆i Ấn Độ. Tơ̆ ‘măng năm tơmang Ấn Độ ‘măng mă au, Kơdră chĕp pơgơ̆r Kuô̆k hô̆i Vương Đình Huệ gô pơma đam hăm Kơdră chĕp pơgơ̆r Hạ viện Ấn Độ, pơma dơnŭh hăm Kơdră chĕp pơgơ̆r Thượng viện, Kơ iĕng Kơdră tơm Ấn Độ păng Thủ tướng Ấn Độ, sơng pơma dơnŭh hăm Tổng bí thư Đảng Cộng sản Ấn Độ, vang năm pơm lêh tơbăt 5 sơnăm tơgoăt tơgoăl jang hơdoi git kăl tôm tong Việt Nam - Ấn Độ, vang năm pơdă rup 50 sơnăm tơbôl ƀar tĕh đak Việt Nam - Ấn Độ, sơng pơma dơnŭh hăm kơdră chĕp pơgơ̆r rim khŭl tơgoăt tơgoăl păng bôl boăl kơ Việt Nam, vang năm Hop akŏm hơnĭh mơdro sa.

Tơblơ̆ nơ̆r: Amazưt