VOV4.Bahnar - Kơsơ̆ năr 23/7,tơ̆ Hnam Kuôk hô̆i, Kuô̆k hô̆i jăl XV pơgơ̆r Pơm lê̆h tơbăt hơdăh păng pơjao Tơdrong tơchơ̆t đơ̆ng Kuô̆k hô̆i, Dơnŏ anĭh bơ̆ jang chĕp pơgơ̆r Kuô̆k hô̆i găh bơ̆ jang kang ƀô̆. Iung pơma tơ̆ pơm lê̆h, Kơdră chĕp pơgơ̆r Kuô̆k hô̆i Vương Đình Huệ pơma hơdăh, đơ̆ng rŏng 2 năr hop akŏm blŭng a tơ̆ ‘Măng hop akŏm mă blŭng, Kuô̆k hô̆i jăl XV, đĭ đăng rim kơchư̆k găh Kuô̆k hô̆i prŏh ăn hlôi đei pôk tơmơ̆t, kĭ tơchơ̆t.

Kơdră chĕp pơgơ̆r Kuô̆k hô̆i Vương Đình Huệ pơjao Tơdrong tơchơ̆t găh bơ̆ jang kang ƀô̆

Kơdră chĕp pơgơ̆r Kuô̆k hô̆i Vương Đình Huệ ‘mĕh vă kơdră chĕp pơgơ̆r rim Dơnŏ anĭh bơ̆ jang kơ Kuô̆k hô̆i đei sơng iŏk păng hơnơ̆ng tơplĭh ‘nao, atŏk kơtang bơ̆ jang ‘lơ̆ng hlŏh dơ̆ng kơ Kuô̆k hô̆i. Kơdră chĕp pơgơ̆r Kuô̆k hô̆i Vương Đình Huệ jei akhan, ‘mĕh vă Khŭl kơdră chĕp pơgơ̆r tĕh đak bơ̆ jang ‘lơ̆ng, tơpăt lei Kuô̆k hô̆i jei kăl bơ̆ jang ‘lơ̆ng, tơpăt, iung jang kơ yuơ kon pơlei, mă kăl lơ̆m tơ iung pơjing khôi luơ̆t, bơ̆ jang dăr lăng, tơchăr trong hơnhăk tĕh đak atŏk tơ iung. Athei, kơdră chĕp pơgơ̆r Jơnŭm vei lăng Kon kông, rim hơnĭh bơ̆ jang, Dơnŏ anĭh bơ̆ jang kơ Kuô̆k hô̆i kăl iung jang kiơ̆ hloi rim trong tơlĕch jang, tơdrong jang đei pơjao, iung jang hloi tơ iung pơjing trong vă jang tơplĭh ‘nao ‘moi kiơ̆ trong tơlĕch vă jang vă jê̆ đei Kuô̆k hô̆i pơjing ăn.

Tơblơ̆ nơ̆r: Amazưt