VOV4.Bahnar - Gơmăng hei, năr 2/4, tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ hlôi krao điên thoăi pơma đam hăm Kơdră chĕp pơgơ̆r Kuô̆k hô̆i Lào Saysomphone Phomvihane. Hmach chơt hơ iă ăn kơ ƀok Saysomphone Phomvihane đei Kuô̆k hô̆i Lào pôk tơmơ̆t jang Kơdră chĕp pơgơ̆r Kuô̆k hô̆i Lào jăl IX, Kơdră chĕp pơgơ̆r Kuô̆k hô̆i Vương Đình Huệ sơkơ̆t hơdăh, Việt Nam ling lang lăng kơ jăp păng ‘măn tơdrong jang blŭng a ăn tơgoăt tơgoăl gĭt kăl hăm Lào, lăng ‘nau jing tơdrong kăl hlŏh hăm ƀar tĕh đak; ling lang tơgŭm djru kơtang, tôm tong kơdră chĕp pơgơ̆r păng kon pơlei Lào lơ̆m bơ̆ jang tơ iung pơjing tĕh đak Lào pơdrŏng hơnŭk hơnoa.

Ƀar păh hơnơ̆ng pơgơ̆r rim ‘măng pơma dơnŭh vă vang chă tơchĕng hơlen rim tơdrong khoa hŏk, pơgơ̆r pơtho pơhrăm atŏk kơtang bơ̆ jang ‘lơ̆ng ăn kơdră tang măt Kuô̆k hô̆i, kơdră tang măt Jơnŭm vei lăng kon pơlei dêh char păng kang ƀô̆ bơ̆ jang kơ Kuô̆k hô̆i Lào. Ƀar păh vang dăr lăng, lăng hơlen păng pơrô̆ pơrôp atŏk kơtang jang hơdoi mŭk drăm, mă kăl mơdro sa, tơmơ̆t jên jang, pơgơ̆r jang kiơ̆ rim tơdrong tơchơ̆t, tơdrong pơkăp păng rim tơdrong drơ̆ng mĭnh nơ̆r ƀar păh Khŭl kơdră chĕp pơgơ̆r tĕh đak hlôi kĭ pơkăp.

Tơblơ̆ nơ̆r: Amazưt