VOV4.Bahnar - Kơsơ̆ năr 21/6, tơ̆ Hnam Kuô̆k hô̆i, Kơdră chĕp pơgơ̆r Kuô̆k hô̆i Vương Đình Huệ hlôi pơma đam trư̆k tuyên hăm Kơdră chĕp pơgơ̆r Hạ viện Nhật Bản Oshima Tadamori. Kơdră chĕp pơgơ̆r Kuô̆k hô̆i Vương Đình Huệ sơkơ̆t dơ̆ng, Việt Nam ling lang lăng Nhật Bản ‘nŏh jing tĕh đak jang hơdoi kăl hlŏh, đunh đai hăm tơdrong lui ngeh dĭh băl kơtang lơ̆m trong jang tơbôl kơ Việt Nam; tơgŭm djru Nhật Bản jang kiơ̆ kơtang hơnăp jang tĕh đak pran kơtang lơ̆m plei tĕh, tơgop kơtang ăn rơngei hiôk hian păng atŏk tơ iung kơ tơring păng apŭng plĕnh tĕh.

Tơ̆ pơma đam, ƀar păh drơ̆ng mĭnh nơ̆r hơnơ̆ng yak năm dĭh băl pơtrŭt kơtang tơgoăt tơgoăl jang hơdoi ƀar păh nghĭ si ƀar tĕh đak, mă kăl nghĭ si sơnăm mơlô̆h, khŭl nghĭ si jang tơbôl; hơnơ̆ng atŏk kơtang ăn kon pơlei ƀar tĕh đak yak năm ngôi dĭh băl ‘moi kiơ̆ pơgơ̆r ăn rim khŭl nghĭ si rim tơring kơ ƀar tĕh đak năm ngôi, bơ̆ jang, pơtrŭt tơmơ̆t jên jang, tơbăt um rup, tơdrong đei  hơ iă tơmang pơ hiơ̆ păng pơgơ̆r vang jŏh ayŏ tơ̆ Việt Nam.

Tơblơ̆ nơ̆r: Amazưt