VOV4.Bahnar - Lơ̆m kơsơ̆ năr 13/12/2021, tơ̆ Hnam Kuô̆k hô̆i Hàn Quốc, Hơnĭh tơm Seoul, Pơm lêh sơng Kơdră chĕp pơgơ̆r Kuô̆k hô̆i Việt Nam hlôi đei pơgơ̆r kơ yuơ Kơdră chĕp pơgơ̆r Kuôk hô̆i Hàn Quốc Park Byeong Seug chĕp pơgơ̆r. Lăp đơ̆ng rŏng pơm lêh sơng, Kơdră chĕp pơgơ̆r Kuô̆k hô̆i Vương Đình Huệ hăm Kơdră chĕp pơgơ̆r Hàn Quốc Park Byeong Seug atŭm hăm Khŭl kơdră tang măt Kuôk hô̆i ƀar tĕh đak pơgơ̆r pơma đam. Ƀar ‘nu kơdră chĕp pơgơ̆r sơkơ̆t hơdăh, mă đơ̆ng jĭ hơbuh Covid-19 pơrăm kơtang mă lei tơdrong tơgoăt tơgoăl ƀar tĕh đak hơnơ̆ng vei kơ jăp atŏk tơ iung lơ̆m lơ tơdrong, mă kăl lơm jang hơdoi chĭnh trĭ, mŭk drăm, tơpôl, vei lăng sơđơ̆ng, sơđơ̆ng tĕh đak păng kon pơlei yak năm ngôi dĭh băl. Ƀar păh tơgŭm djru tơdrong hơtŏk tơgoăt tơgoăl ƀar tĕh đak jing “Tĕh đak jang hơdoi tôm tong Việt Nam – Hàn Quốc. Kơdră chĕp pơgơ̆r Kuô̆k hô̆i Vương Đình Huệ ‘mĕh vă Hàn Quốc vang chă tơbăt ăn trong jang hơ iă găh atŏk tơ iung mŭk drăm, lơ̆m au đei atŏk tơ iung rơ gŏh ‘lơ̆ng, tơplĭh ‘nao tơchăr. Ƀar păh drơ̆ng mĭnh nơ̆r hơdrin iŏk đei tĕch mơdro dĭh băl trŭh 100 ti dolar lơ̆m sơnăm 2023 păng 150 ti dolar lơ̆m sơnăm 2030.

Tơblơ̆ nơ̆r: Amazưt