VOV4.Bahnar - jang kiơ̆ tơdrong jang năm tơ ƀơ̆p pơma dơnŭh hăm bơngai tăh hla đơ̆ng rŏng hop akŏm, pơgê năr 17/11, tơ̆ kuân Hải An, pơlei tơm Hải Phòng, Kơdră chĕp pơgơ̆r Kuô̆k hô̆i Vương Đình Huệ atŭm hăm rim kơdră tang măt Kuô̆k hô̆i pơlei tơm Hải Phòng hlôi năm tơ ƀơ̆p pơma dơnŭh hăm bơngai tăh hla vă tơroi tơbăt pơtôch ‘măng hop akŏm mă 2, Kuô̆k hô̆i jăl XV păng tơdrong jang kơ Kuô̆k hô̆i pơlei tơm Hải Phòng tơ̆ ‘măng hop akŏm.

Tang măt ăn Khŭl kơdră tang măt Kuô̆k hô̆i, Kơ iĕng Kơdră chĕp pơgơ̆r Khŭl kơdră tang măt Kuô̆k hô̆i pơlei tơm Hải Phòng Lã Thanh Tân hlôi tơroi tơbăt ăn bơngai tăh hla dôm tơdrong iŏk đei jơnei kơ ‘măng hop akŏm mă 2, Kuô̆k hô̆i jăl XV. Tơgoăt iŏk rim nơ̆r tơgop đơ̆ng bơngai tăh hla đei ƀơm trŭh rim tơdrong, Kơdră chĕp pơgơ̆r Kuô̆k hô̆i Vương Đình Huệ athei Jơnŭm vei lăng kon pơlei, Dơnŏ anĭh vei lăng kon pơlei kơ Pơlei tơm Hải Phòng tơgoăt iŏk dôm nơ̆r tơgop đơ̆ng tơring. Khŭl kơdră tang măt pơlei tơm gô akŏm, tơroi tơbăt Kuô̆k hô̆i tơgoăt iŏk dôm nơ̆r tơgop ăn kơ khŭl kơdră Kuô̆k hô̆i. Dôm nơ̆r tơgop găh tơdrong jang kơ Khŭl kơdră chĕp pơgơ̆r tĕh đak, Khŭl kơdră tang măt Kuô̆k hô̆i pơlei tơm Hải Phòng gô tơroi tơbăt vă Khŭl kơdră tĕh đak xek tơlang ăn.

Tơblơ̆ nơ̆r: Amazưt