VOV4.Bahnar - Năr 10/5, tơ̆ apŭng Tiên Lãng, Kơdră chĕp pơgơ̆r Kuô̆k hô̆i Vương Đình Huệ atŭm hăm rim kơdră đei hơnăn ăn pôk tơmơ̆t pơm Kơdră tang măt Kuô̆k hô̆i jăl XV hơnơ̆ng iung jang pơma dơnŭh hăm bơngai tăh hla tơ̆ Hơnĭh tăh hla kơsô̆ 3, pơlei tơm Hải Phòng, đei rim kuân, apŭng Kiến An, Dương Kinh, An Lão, Tiên Lãng păng Vĩnh Bảo.

Tơ̆ hop akom, bơngai tăh hla apŭng Tiên Lãng lăp đon hăm trong bơ̆ jang đơ̆ng rim kơdră tang măt, adoi pơma tơbăt jơhngơ̆m đon ‘meh vă rim kơdră đei pôk tơmơ̆t gô iung jang đĭ jơhngơ̆m đon, jang tơnăp hlŏh dơ̆ng kơ bơngai tang măt Kuô̆k hô̆i tơklep hăm kon pơlei hlŏh dơ̆ng, mơ̆ng păng yom kiơ̆ nơ̆r tơgop đơ̆ng kon pơlei. Tang măt ăn dôm bơngai đei hơnăn ăn pôk tơmơ̆t pơm Kơdră tang măt Kuô̆k hô̆i tơ̆ hơnĭh tăh hla kơsô̆ 3, Kơdră chĕp pơgơ̆r Kuô̆k hô̆i Vương Đình Huệ bơnê, tơgoăt iŏk nơ̆r tơgop phăl hơlăng, tơpăt đơ̆ng rim bơngai tăh hla. Adoi sơkơ̆t hơdăh, tơdăh đei pôk tơmơ̆t gô iung jang ‘lơ̆ng hơnăp jang, sơnong jang kơ bơngai tang măt, jang keh đang dôm nơ̆r pơma pơkăp tơ̆ hơnăp bơngai tăh hla, mă kăl ‘nŏh ling lang tơ jê̆, tơklep hăm kon pơlei, jing gơng tơrŏh klŏh klĕch hơnhăk nơ̆r tơgop, tơdrong hơpơi ‘mĕh vă đơ̆ng bơngai tăh hla, kon pơlei pơtrŭh ăn kơ Kuô̆k hô̆i băt.

Tơblơ̆ nơ̆r: Amazưt