VOV4.Bahnar - Lơ̆m ‘măng năm tơmang tĕh đak Cộng hòa Phần Lan, Kơdră chĕp pơgơ̆r Kuô̆k hô̆i Vương Đình Huệ hlôi pơma dơnŭh hăm Thủ tướng Phần Lan yă Sanna Marin. Thủ tướng Sanna Marin sơkơ̆t hơdăh, Việt Nam jing mĭnh lơ̆m dôm tĕh đak jang hơdoi kăl hlŏh kơ Phần Lan lơ̆m ASEAN păng tơ̆ châu Á -Thái Bình Dương, ƀar tĕh đak hlôi jang hơdoi jơnei găh mŭk drăm, pơtho pơhrăm, jang hơdoi atŏk tơ iung, cham char. Ƀar ‘nu kơdră chĕp pơgơ̆r jei pơma dơnŭh găh jang hơdoi lơ̆m rim trong jang lơ pang, sơkơ̆t hơdăh ƀar tĕh đak jei vang jang păng đei hơnăp jang tôch hơdrin tơ̆ EU păng ASEAN, kăl hơnơ̆ng vei kơ jăp jang hơdoi păng tơgŭm djru dĭh băl, vang iung jang hơdrin atŭm tơgoăt dĭh băl ASEAN- EU, tơgop hơmet pơ ‘lơ̆ng tơgoăt tơgoăl jang sa gĭt kăl ASEAN-EU ‘nao đei pơjing.

Tơblơ̆ nơ̆r: Amazưt