VOV4.Bahnar - Ƀlep lơ̆m năr vang năm Hop akŏm rim Kơdră chĕp pơgơ̆r Kuô̆k hô̆i apŭng plĕnh tĕh ‘măng mă 5, Kơdră chĕp pơgơ̆r Kuô̆k hô̆i Vương Đình Huệ hlôi sơng pơma dơnŭh hăm Kơ iĕng Kơdră chĕp pơgơ̆r Hạ viện Tĕh đak Anh yă Eleanor Laing.

Kơdră chĕp pơgơ̆r Kuô̆k hô̆i Vương Đình Huệ pơm ahơdăh, Anh ‘nŏh tĕh đak jang hơdoi mơdro sa tĭh hlŏh dơ̆ng mă 3 kơ Việt Nam lơ̆m tơring châu Âu, Tơdrong tơchơ̆t Mơdro sa hiôk hian đei jang kiơ̆ đơ̆ng năr 1/5/2021, pơjing rơvơn atŏk kơtang hlŏh dơ̆ng tơdrong mơdro sa dĭh băl kơ ƀar păh. Trŭh dang ei, Anh đei 421 tơdrong jang tơmơ̆t jên jang lơ̆m Việt Nam, hăm akŏp kon jên 3 ti 920 trĭu dollar Mi. Kơdră chĕp pơgơ̆r Kuô̆k hô̆i Vương Đình Huệ sơkơ̆t hơdăh, Việt Nam tơgŭm djru Anh atŏk kơtang tơgoăt tơgoăl jang mŭk drăm mơdro sa hăm tơring păng tơgŭm tĕh đak Anh lơ̆m pơma đam vă vang mơ̆t lơ̆m Tơdrong tơchơ̆t Jang hơdoi tôm tong păng Gơ̆h hơgei klŏh klĕch Thái Bình Dương. Kơdră chĕp pơgơ̆r Kuô̆k hô̆i Vương Đình Huệ akhan, ƀar tĕh đak kăl lăng ba trŭh tơ iung pơjing trong jang hơdoi iŏk đei jơnei kơ jăp, tơgăl hăm tơdrong đei păng tơgoăt tơgoăl Jang sa hơdoi gĭt kăl kơ ƀar tĕh đak.

Tơblơ̆ nơ̆r: Amazưt