VOV4.Bahnar - Lơ̆m ‘măng năm tơmang tĕh đak Hàn Quốc, pơgê năr 15/12/2021, Kơdră chĕp pơgơ̆r Kuô̆k hô̆i Vương Đình Huệ hlôi sơng pơma dơnŭh hăm Kơdră chĕp pơgơ̆r Grŭp jang Amkor Technology Ji Jong-rip hăm Kơdră chĕp pơgơ̆r Grŭp jang jên hu Hana Kim Jung-tai. ‘Nau jing ‘măng pơgơ̆r tuch luch, pơtôch ‘lơ̆ng hơ iă ‘măng năm tơmang Hàn Quốc đơ̆ng Kơdră chĕp pơgơ̆r Kuô̆k hô̆i Vương Đình Huệ hăm Khŭl Kơdră tang măt Kuô̆k hô̆i Việt Nam. Tơ̆ jơ bơ̆ jang hăm Amkor Technology, Kơdră chĕp pgơ̆r Kuô̆k hô̆i Vương Đình Huệ hmach chơt hơ iă kơ Grŭp jang đei pôk ăn Hla bơar drơ̆ng nơ̆r tơmơ̆t jên jang Hnam kmăi pơlăp păng jang pơlong năng kmăi kmŏk tơ̆ dêh char Bắc Ninh hăm kon jên tơmơ̆t jang 1 ti 600 trĭu dolar. Kơdră chĕp pơgơ̆r Kuô̆k hô̆i Vương Đình Huệ pơma hơdăh, Việt Nam tơgŭm djru păng pơkăp gô atŭm yak hơdoi hăm Grŭp jang Amkor Technology lơ̆m tơlĕch jang kiơ̆ păng iung jang tơdrong vă jang pơjing rơvơn vă Grŭp tơmơ̆t jên jang atŏk tơ iung mơdro sa kơ jăp ‘lơ̆ng tơ̆ Việt Nam.

Tơ̆ ‘măng tơ ƀơ̆p Grŭp jang jên hu Hana (Hana Financial Group), Kơdră chĕp pơgơ̆r Kuô̆k hô̆i Vương Đình Huệ athei Hanabank athei hơnơ̆ng vang chă tơbăt ăn trong jang hơgei, rim trong mơdro sa ‘nao ‘moi kiơ̆ jang kmăi kmŏk, pơtrŭt kơtang rim khŭl jang hơdoi Hàn Quốc pơ̆ih să tơmơ̆t jên jang tơ̆ Việt Nam.

Tơblơ̆ nơ̆r: Amazưt