VOV4.Bahnar - Kơsơ̆ năr 14/7, tơ̆ Hnam Kuô̆k hô̆u, Kơdră chĕp pơgơ̆r Kuô̆k hô̆i Vương Đình Huệ hlôi sơng pơma dơnŭh hăm Kơdră tang măt tĕh đak Philippines Meynardo Los Banos Montealegre trŭh kuh ka hla bat. Iung pơma tơ̆ jơ sơng, Kơdră chĕp pơgơ̆r Kuô̆k hô̆i Vương Đình Huệ athei Kơdră tang măt tĕh đak Philippines lơ̆m jăl jang kơ dĭh, jang hơdoi pơtrŭt kơtang tơlĕch jang kiơ̆ rim tơdrong kăl jang hơdoi ƀar păh Kuô̆k hô̆i  Việt Nam hăm Thượng viện păng Hạ viện Philippines; lăng trŭh lăng hơlen kĭ tơchơ̆t drơ̆ng mĭnh nơ̆r jang hơdoi ƀar păh Kuô̆k hô̆i pơm trong ăn rim tơdrong jang hơdoi, vă tơgăl hăm tơgoăt tơgoăl jang hơdoi gĭt kăl ƀar păh tĕh đak păng tơgoăt tơgoăl ‘lơ̆ng hơ iă ƀar Kuô̆k hô̆i. Đei ƀơm trŭh tơdrong sơđơ̆ng tơ̆ Biển Đông păng sơđơ̆ng ăn duk kơdau, Kơdră chĕp pơgơ̆r Kuô̆k hô̆i Vương Đình Huệ lăp đon hăm nơ̆r pơma tơgop đơ̆ng Kơdră tang măt kăl atok kơtang pơma dơnŭh dĭh băl, tơgŭm trong bơ̆ jang dĭh băl găh Biển Đông kiơ̆ trong drơ̆ng mĭnh nơ̆r kơ ASEAN, jang kiơ̆ tôm tong păng jơnei DOC păng jang hơdoi kơ jăp lơ̆m pơma đam COC ‘moi kiơ̆ yom kiơ̆ khôi luơ̆t apŭng plĕnh tĕh, mă kăl Tơdrong pơkăp kơ Liên hợp quốc găh Khôi luơ̆t đak dơsĭ 1982.

Tơblơ̆ nơ̆r: Amazưt